Gong gai, mơnuih ƀôn sang hăng khul mơnuih bơwih ƀong amăng bruă tuai čuă ngui ƀơi kual Tŏng krah dêh čar hmâo gir run yak rơgao tơlơi tơnap, hơkrŭ glăi kơtang hơdôm bruă mă wai lăng tuai čuă ngui. Truh kih mơng thun Tuai čuă ngui dêh čar – Quảng Nam thun 2022 pơjing phun than pioh hrưn đĭ kơ bruă măi mok ƀu hmâo asăp.

 Gru grua bôh thâo Rŏng lŏn tơnah Hội An, tơring čar Quảng Nam hơdôm hrơi rơnuč thun 2022, ƀơi hơdôm glông jơlan amăng plơi prong hmâo lu tuai mơng dêh čar tač rơngiao. Sang jưh tuai hăng hơdôm anih anom bơwih brơi kơ tuai čuă lăng dik dăk. Ƀu hmâo hlơi pơmin rơđah, sa thun hlâo adih, plơi prong Hội An kret kruai, lơleh. Plơi prong hmâo truh 2/3 mrô mơnuih mă gah bruă wai lăng tuai čuă ngui hmâo găn rơgao rơbêh kơ 2 thun plư̆ kup blư̆ đang, tơlơi hơdip mơda mơnuih ƀôn sang tơnap tap yua kơ klin Covid-19 ngă. Ră anai, Hội An hmâo hơkrŭ glăi laih gru rŭp mơng plơi prong tuai čuă ngui, kah hăng akă hmâo “klin prong ngă” hơpă găn rơgao ƀơi anih anom anai.  

Amai Nguyễn Thanh Tâm, pô Sang jưh An, plơi prong Hội An yŭ ngŏ prăp lui kơ jơlan hơdră čơkă tuai tal Tết Prang hăng Tết tui phiăn juăt djuai ania Quý Mão. Tui hăng amai Nguyễn Thanh Tâm, hơdôm hrơi tơnap tap amăng dua thun rơgao hmâo djru laih mơnuih mă bruă wai lăng tuai čuă ngui ƀơi Hội An ngă juăt hăng ngă phrâo pô kiăng pơđĭ kyar bruă tuai čuă ngui tui jơlan gah kơjăp phik, kiăo tui hơdră ngă tuai čuă ngui mơtah. Khă tơhnal pơkă kơ bruă tuai čuă ngui hơdjă phrâo dưi hmâo tơring čar Quảng Nam mă yua amăng blan 3 thun 2022, samơ̆ bôh nik ñu, hmâo lu anih anom bơwih ƀong wai lăng tuai čuă ngui ƀơi Hội An hmâo ngă tui laih hơdôm tơhnal pơkă anai dong mơng sui. Rơđah biă ñu kah hăng lăi ƀu hmâo hăng djah kơ su, hơdư̆ yua kơdung nilong, ƀuăt kơ su sa wot, ngă bruă tŭ jum tuai mơ-ak klă hăng anih anom dô̆. Amai Nguyễn Thanh Tâm brơi thâo, blung a mơnuih mă bruă hăng wot tuai čuă ngui leng kơ ƀuh hling hlang, lu mơnuih ƀu tŭ ư hrom samơ̆ kơnang kơ gir run ngă tui anun ră anai jing juăt laih.

 “Jơlan gah phrâo ră anai mơng tuai dêh čar tač rơngiao hăng ƀing hlăk ai Việt Nam leng kơ hmâo tơlơi pơmin klă kơ rơnăk anih anom dô̆. Lom gơñu lăng ƀuh pô dưi kiăo tui jơlan gah anai lĕ gơñu dŏng yua biă”.

 Rơbêh kơ 2 thun rơgao, klin Covid-19 hmâo ngă laih 42 rơbâo čô mơnuih mă bruă gah wai lăng tuai čuă ngui ƀơi ƀôn prong Đà Nẵng rơngiă bruă mă. Mrô anai ƀơi 2 tơring čar Thừa Thiên Huế, Quảng Nam đĭ trun mơng 14 rơbâo truh 18 rơbâo čô mơnuih mă bruă. Khă hnun hai, tơdơi kơ pok glăi bah amăng anih anom tuai čuă ngui, thun 2022, tơring čar Quảng Nam hmâo čơkă laih 4 klăk 800 rơbâo wot čô tuai hăng abih bang pơhrui hmâo năng ai ñu 3.800 klai prăk, pơjing bruă mă brơi rơbêh kơ 16.000 čô mơnuih mă bruă. Ơi Phan Hộ, Khua Grŭp wai lăng gru grua bôh thâo Mỹ Sơn brơi thâo, khă tơnap tap samơ̆ anom hmâo gir run laih djă kŏng 125 čô mơnuih mă bruă. Lom pok glăi anih anom tuai čuă ngui, Mỹ Sơn hmâo čơkă laih rơbêh kơ 105 rơbâo wot čô tuai čuă ngui, đĭ rơbêh 110% bơhmu hăng kơčăo bruă thun 2022.

 “Amăng hơdôm hrơi gơgrong ba bơbeč mơng klin ruă, ƀing gơmơi ƀu hmâo prăk pơhrui glăi hơpă. Hăng sa anom gơgrong mă pô abih bang gah prăk kak lĕ tơnap tap biă. Ƀing gơmơi pơsur khul mơnuih apăn bruă, mơnuih mă bruă, hrom hăng anun mă yua keh prăk pơhlôm hlâo kiăng pơsir brơi prăk blan kơ gơñu. Khul mơnuih apăn bruă, mơnuih mă bruă đăo gơnang kơ anom hăng gơñu gum hrom gir run kiăng yak rơgao tơlơi tơnap”.

Việt Nam dŏng amăng hră čih anăn hơdôm bôh dêh čar pok glăi bah amăng anih anom tuai čuă ngui tañ hloh kual hăng dưi hmâo Khul wai lăng tuai čuă ngui rŏng lŏn tơnah pơsit lĕ hmâo hơdră bruă pok bah amăng mơ-ak klă hloh. Thun 2022, hơdôm bôh tơring čar, ƀôn prong kual Tŏng Krah dêh čar gơgrong hlâo pơphun hơdôm bruă jơnum prong gah jar kơmar; pok pơhai lu bruă mă pơtrut, lăi pơhing truh hơdôm bôh dêh čar kual Mi Kô̆, Hàn Quốc, Singapore, India, Japan, amăng ƀrư̆ hơkrŭ glăi hơdôm jơlan rơdêh por nao pơ̆ dêh čar tač rơngiao. Ƀơi ƀôn prong Đà Nẵng, hơdôm jơlan por mơng dêh čar tač rơngiao nao ƀôn prong Đà Nẵng dưi pok pơhai, tô glăi tơdơi kơ tơ̆i đưn hmâo tô glăi laih hăng dêh čar tač rơngiao. Tui mrô yap mơng Anom wai lăng bruă tuai čuă ngui Việt Nam, thun 2022, mrô tuai dêh čar tač rơngiao rai pơ̆ Việt Nam him lăng hmâo 3 klăk 500 rơbâo wot čô mơnuih. Sa amăng hơdôm jơlan yôm phăn pioh ngă pơhư̆č tuai dêh čar tač rơngiao lĕ pơjing phrâo dong anih anom tuai čuă ngui, pơtrut kơtang pơlir hơbit anih anom tuai čuă ngui hăng lu tơring čar, ƀôn prong amăng đơ đam dêh čar. Ơi Lê Trí Thanh, Khua Jơnum min mơnuih ƀôn sang tơring čar Quảng Nam brơi thâo, pơlir hơbit pơđĭ kyar anih anom tuai čuă ngui jing jơlan nao sit yơh, ƀu djơ̆ kơnong kơ djru hơdôm anih anom dưi ngă tui anô̆ gal ha jăn mơng pô ôh mơ̆, ñu dô̆ mă yua hơdôm nua yôm hrom gah kông ngăn, gru grua bôh thâo amăng kual, djru pơtrut bruă wai lăng tuai čuă ngui pơđĭ kyar kơjăp phik.

 “Ƀing gơmơi hmâo pơjing laih hơdôm anung gơnam hluai tui kơ lŏn dlai, mă yua hơdôm nua yôm mơ̆ lŏn dlai hmâo hơđăp ƀơi Quảng Nam ăt kah hăng nua bôh thâo đưm, kual lŏn, ană mơnuih mơ̆ Quảng Nam hmâo lu anô̆ gal. Hrom hăng anun ăt amra pơlir hơbit mơn hăng hơdôm anih anom pơkon amăng Kual bơwih ƀong phun kual Tŏng Krah dêh čar nao hrom hăng pơjing anih anom tuai čuă ngui lăp djơ̆ pioh lăi pơhư̆č anih anom tuai čuă ngui hơdjă kơ tuai dêh čar tač rơngiao”.

Amăng mông ngă Lơphet ƀơk pri bơni Tuai čuă ngui rŏng lŏn tơnah thun 2022 – kual ASIA hăng Kual Ia rơsĭ, čuă ngui Việt Nam hmâo čơkă mă 16 pri bơni anih tuai čuă ngui, pơsit dong anăn păn gơnam, bruă mă hăng pran gơgrong mơng bruă wai lăng tuai čuă ngui Việt Nam amăng kual hăng đơ đam rŏng lŏn tơnah. Ơi Đoàn Văn Việt, Kơ-iăng Khua Ding jum bôh thâo, bơkơjăp drơi jăn hăng tuai čuă ngui pơsit, bruă pơphun truh kih Thun tuai čuă ngui dêh čar – Quảng Nam 2022 hmâo ba glăi laih bôh tơhnal prong amăng bruă ngă pơhư̆č tuh pơplai, pơđĭ kyar anih anom tuai čuă ngui hăng bruă pơtrut lăi pơhư̆č gru rŭp, lŏn ia, ană mơnuih Việt Nam, pơjing gru rơđah hăng ngă pơhư̆č mơng bruă wai lăng tuai čuă ngui Việt Nam lom pơđut bruă wai lăng tuai čuă ngui thun 2022 anăp nao truh thun 2023 bă kơ tơlơi mơ-ak, čang rơmang tô̆ tui hơdôm truh kih./.