Khă hnun hai, tơdơi kơ hơdôm hrơi blan wai lăng mơng ƀirô wai lăng, kual lŏn ngă đang pla gôm mơnil, păng rưng pơđĭ kyar mă pô tui rơnoh tañ, ngă sat truh anih anom hiam, rơhuông adai lŏn mơnai hăng hmâo tôm hơdôm tơlơi ƀu klă pơkon. Yua anun, tơring čar Lâm Đồng glăk pơdŏng hơdôm jơlan gah ngă tui tơlơi pơsir anih anom mă yua, rit đuăi abih bang kual sang gôm mơnil, păng rưng tơbiă mơng krah kual plơi prong Đà Lạt hăng hơdôm bôh tơring čar jum dar.

Dong mơng thun 2004, tơring čar Lâm Đồng mă yua tơlơi pơsit Jơlan hơdră pơđĭ kyar bruă đang hmua tui hơdră phrâo. 6 thun tơdơi, anun lĕ thun 2010, đơ đam tơring čar hmâo pơhư prong 6.400 ektar lŏn ngă đang blok tui hơdră phrâo, amăng anun hmâo sang gôm păng rưng, mơnil lĕ 1.170 ektar; thun 2015 kual lŏn anai pơhư prong dong truh rơbêh kơ 43.000 ektar hăng sang gôm mơnil giăm truh 3.150 ektar. Truh thun 2020, abih bang kual ngă đang hmua tui hơdră phrâo mơng Lâm Đồng lĕ 60.200 ektar, hăng kual đang pla gôm păng rưng hmâo giăm truh 4.350 ektar, amăng anun lu ñu lŏn pla gôm ƀơi plơi prong Đà Lạt.

Ơi Trần Quang Duy, Kơ-iăng Khua Anom bruă wai lăng bruă tơjŭ pla hăng pơgang phun pla tơring čar Lâm Đồng brơi thâo, yua kơ bruă pơđĭ kyar sang gôm kơƀah tơlơi wai lăng, biă ñu hơdôm kual pla gôm rô̆ mă lŏn dlai, plăng pơgang hơdôm ring bruă jơlan nao rai, hnoh ia, kual djă pioh gru grua đưm, bôh thâo đưm, anăn păn anih anom hiam... hmâo bơdjơ̆ nao laih anih anom hiam mơng plơi prong. Hrom hăng anun, lu lŏn pla gôm ƀu djơ̆ tơhnal pơkă, rơnoh man pơdŏng lu, ƀu hmâo jơlan pơhrui mă, pơđoh ia jing glông ia rô prong, ngă ia ling kor hăng ngă hrŏ hĭ ia hram mut amăng lŏn ba truh hrŏ trun ia amăng lăm lŏn, tơhroh đuăi lŏn, ngă lip ƀơi sa dua bit anih hăng lu anô̆ bơdjơ̆ nao ƀu klă pơkon. Ơi Trần Quang Duy, brơi thâo:

 “Yua kơ bôh tơhnal bơwih ƀong ba glăi lu anun mơnuih ƀôn sang hmâo pơđĭ kyar tañ biă. Ăt lăng ƀuh kơ bơnah Kơnuk kơna ăt akă hmâo hơdôm tơlơi pơkă hăng pơtă rơđah kơ mơnuih ngă đang hmua ôh. Kiăng sang gôm pla phun pla pơđĭ kyar mă pô, gơñu pơdŏng laih rơnoh kier, giăm nao rai jing bơbeč truh anih anom hiam, truh dlai tlô... Ƀơi anăp tơlơi anai, mơng blan 10/2019, Jơnum min mơnuih ƀôn sang tơring čar hmâo črâo ba rơđah kơ Gơnong bruă đang hmua hăng pơđĭ kyar ƀôn lan tơring čar pơdŏng akô̆ bruă wai lăng, lăng tui, hrŏ trun anô̆ bebeč sat mơng sang gôm ngă đang pla, sang păng rưng ƀơi tơring čar Lâm Đồng”.

Kiăo tui anun, tơring čar Lâm Đồng glăk đing nao pok pơhai hơdôm bruă pơsir kiăng hrŏ trun ƀơƀrư̆ hăng anăp nao ƀu dô̆ kual lŏn ngă sang gôm ƀơi hơdôm kual amăng krah plơi prong, kual mơnuih ƀôn sang ƀơi plơi prong Đà Lạt hăng hơdôm bôh tơring glông jum dar. Tơhnal ba tơbiă lĕ truh thun 2025 hrŏ trun 20% kual lŏn ngă đang pla sang gôm bơhmu hăng ră anai, hăng truh thun 2030 hrŏ trun ƀơƀrư̆, anăp nao ƀu dô̆ kual lŏn ngă đang sang gôm amăng kual krah plơi prong Đà Lạt.

Kiăng ngă tui tơhnal pơkă anai, tơring čar Lâm Đồng črâo ba hơdôm ƀirô, anom bruă gơgrong tơlơi anai pel ĕp, pơjing hơdôm yak rit đuăi, pơsir kual sang gôm pơdŏng ƀu djơ̆ tơlơi phiăn. Hrom hăng anun, pơptrut kơtang pơplih lŏn ngă đang hmua, mă yua hơdră ngă đang hmua ƀu mă yua sang gôm; pơplih tui ƀơƀrư̆ hơdai nao pơđĭ kyar bruă đang hmua plơi prong, đang hmua dlai tlô, hluh gah, hơdjă... nao hrom hăng pơgang anih anom hiam. Abih bang prăk ngă tui giăm truh 177 klai prăk, amăng anun ngăn drăp kơnuk kơna kơnong kơ hmâo 1,7%, dô̆ glăi lĕ prăk mơng hơdôm khul grŭp, mơnuih. Ơi Phạm S, Kơ-iăng Khua Jơnum min mơnuih ƀôn sang tơring car Lâm Đồng pơtŏng sit, bruă rit đuăi, pơsir sang gôm amăng krah plơi prong Đà Lạt hăng hơdôm tơring glông jum dar kiăng kơtưn wai lăng sang gôm, pơtrut bruă ngă đang hmua mă yua hơdră phrâo djơ̆ hăng pơplih ayuh hyiăng.

 “Lu tơlơi gum pơhiăp lăi lĕ bruă đang hmua tui hơdră phrâo khom lĕ sang gôm, bôh nik lĕ ƀu djơ̆ tui anun ôh. Sang gôm mơnil, đang sang păng rưng kơnong kơ sa amăng hơdôm bruă mă, anom mă yua kơ đang hmua tui hơdră phrâo mơ̆ kơnong hmâo đing nao pla añăm hăng bơnga. Amăng rơwang 20 thun rơgao kual lŏn ngă đang gôm mơnil mơng Đà Lạt pơlar tañ biă, pơplih djơ̆ sang gôm mơnil hmâo ba tơbiă samơ̆ khom hmâo lu prăk tuh pơplai, ƀing pô đang ƀu hmâo djop prăk anun gơñu pơkra sang gôm mơnil kơjăp ƀơƀiă, phrâo rơnuk anai ƀiă hăng sang gôm mơnil hmâo tơhnal jăng jai... anun pơlar rơnoh tañ. Yua pơđĭ kyar tañ anun đing nao ăt hmâo mơn samơ̆ anô̆ ƀu klă ăt hmâo mơn. Ƀing gơmơi pơsit jơlan gah tơdơi kơ thun 2030 kual ngă đang pla gôm mơnil ƀơi kual krah plơi prong Đà Lạt amra dưi rit đuăi pơ̆ hơdôm kual kơtuai guai plơi prong”.

Tơring čar Lâm Đồng glăk run pran pơdŏng Đà Lạt plơi prong phrâo rơnuk anai, anih phun tuai čuă lăng dlai tlô, pơdơi pơdă yôm... nao hrom hăng pơkă kual pơđĭ kyar “Plơi prong amăng dlai, dlai amăng plơi prong”. Yua anun, lui hĭ, ba đuăi sang gôm mơng kual krah plơi prong jing tơlơi kiăng biă hăng kiăng ječ dong./.