Anom bruă ia jrao Dak Lak ră anai hơmâo abih bang 6.660 čô khua mua, mơnuih apăn bruă, amăng anun hơmâo rơbêh 20,5% mrô khua mua, ơi ia jrao, nai ia jrao hrăm gưl prong hăng dlông hloh. Đơ đam tơring čar hơmâo rơbêh 92,3% sang ia jrao să hơmâo ơi ia jrao soh laih anun djop sang ia jrao hơmâo blơi prăp djop gơnam yua mă bruă pơkĕ internet, pơtruh hmar tơlơi pơhing, mă yua bơnah čih pơthâo tañ gah bruă ia jrao. Biă mă ñu, mrô sang ia jrao să ngă djơ̆ tơhnal pơkă mơ̆ng dêh čar truh thun 2030 hơmâo ngă lu hloh rơnoh jao. Ƀơi anăp tơlơi lông lăng klin kheng hŭi  rơhyưt ăt dŏ hơmâo kah hăng tơlơi hơdrap A H1N1, kman Ebola, MERS-CoV, SARS hăng Covid 19, anom bruă ia jrao tơring čar Dak Lak hơdai gum hrŏm pok pơhai tañ, pơhlôm pơgang hmar, pơjrao tơlơi suaih pral kơ mơnuih ƀôn sang khut khăt, pơgăn tŭ yua kman duăm ruă.

Dưi ngă djop tơhnal kiăng amăng bruă pơgang suaih pral brơi mơnuih ƀôn sang, anom bruă ia jrao Dak Lak ăt thâo laih hơdră ba yua măi mok phrâo pơjrao ruă hơtai boh, pơjrao boh ƀleh răm, brơi đuăi hăng boh ƀleh pơkra ming mă, breh pơčrang hăng đing, pơhrŏ ƀiă mrô mơnuih duăm kraih khom nao pơ sang ia jrao prong hloh. Hăng boh tơhnal dưi ngă anun, anom bruă ia jrao Dak Lak hơmâo tŭ mă Miđai mă bruă lu hơnơ̆ng, Akhăn gru bơkơtưn mă bruă rơgơi hloh, hrŏm hăng lu hră apah bơni mơ̆ng Khua dêh čar, Ding jum ia jrao; lu ơi ia jrao rơgơi mă bruă sui thun dưi apah bơni.