Mơ̆ng akŏ thun truh ră anai, đơ đam dêh čar ta hơmâo čih pioh 40.000 čô mơnuih ƀă klin djơ̆ hmơi ƀơi 63 boh tơring čar, ƀôn prong, amăng anun 3.500 čô ƀă hăng duăm sit nik laih ƀơi 61 boh tơring čar, ƀôn prong. Mrô mơnuih đing ƀă hăng ƀă laih hơmâo lu hloh ƀơi kual Dơnung, truh 57% mrô mơnuih ƀă pơkă hăng amăng dêh čar, kual Tong krah 19,2%, kual Kơdư hơmâo 15,1%, kual Dap Kơdư 8,7%. Nai prin tha Hoàng Minh Đức, khua anom bruă pơhlôm pơgang tơlơi duăm ruă brơi thâo, hơmâo 5 čô mơnuih laih djai yua tơlơi ruă djơ̆ čut ƀơi tơring čar Quảng Nam:

“Ƀing djai phrâo anai lu biă mă ñu ƀơi tơring glông Nam Trà My, tơring čar Quảng Nam. Pô djai anai čơđai djơ̆ hmơi samơ̆ sang anŏ ƀu ba nao pơ sang ia jrao ôh pơjrao, pung iâu pơjâo djă hla tơpa gai ngă yang pơ sang đôč. Truh duăm kraih laih ba nao pơ sang ia jrao ƀu dưi pơjrao dơ̆ng tah djai hĭ”.

Hơdôm boh tơring čar ƀôn prong hơmâo mrô mơnuih ƀă klin djơ̆ hmơi lu lĕ Cao Bằng, Nghệ An, Quảng Nam, Đà Nẵng, Khánh Hòa, Dak Lak, Gia Lai, Kon Tum, Đồng Tháp, An Giang, Lâm Đồng. Hơdôm plơi pla tơring glông hơmâo lu mơnuih ƀă samơ̆ dưi pơhlôm hĭ laih kah hăng Lào Cai, Hà Giang, Hà Tĩnh, Bình Thuận, Bạc Liêu, ƀôn prong Hồ Chí Minh, Bình Dương, Đồng Nai, Tây Ninh, Cà Mau.

Tui hăng anom bruă pơhlôm pơgang duăm ruă, amăng thun 2024, mrô mơnuih tlâ̆o vaccine pơgang klin djơ̆ hmơi djơ̆ thun pơkă rơbêh 97%. Samơ̆, amăng tal jak iâu pơphun tlâ̆o pơgang ƀơi 31 boh tơring čar, ƀôn prong hŭi ƀă kơtang ră anai dŏ 7 boh tơring čar ƀôn prong aka ngă djop tơhnal pơkă mơ̆ng Ding jum ia jrao. Git gai jơnum mơ̆ng ataih, pơƀuh ƀô̆ mơta lăng nao rai amăng tivi hăng djop tơring čar phrâo anai, Khua ding jum ia jrao yă Đào Hồng Lan pơtrun hiăp kơ djop anom bruă ia jrao pơgang gah Ding jum ia jrao wai lăng khom kơđiăng tong ten klin djơ̆ hmơi, ba truh tơlơi djơ̆ čut ƀơi hơdôm tơring čar hơmâo mrô tlâ̆o pơgang dŏ ƀiă đơi, hơdôm tơring čar amăng kual čư̆ siăng, anih lu mơnuih ƀôn sang djuai ƀiă dŏ, tơlơi gêh găl amăng bruă tŭ mă ia jrao hăng hơdră pơjrao dŏ kơƀah:

“Ding jum ia jrao lăi pơthâo hăng kơnuk kơna brơi ngă hră pơtrun brơi pơtrut hmar ƀiă rơnoh tlâ̆o vaccine pơgang ƀơi djop tơring čar anun. Ding jum ia jrao hơmâo dăp hơdră, akŏ bruă pơphun amăng bruă mă brơi tlâ̆o pơgang vaccine djơ̆ hmơi thun 2025, biă mă ñu hrơi mông kah hăng anai, ayuh hyiăng hlim hơjan, pơđiă phang ƀu djơ̆ găl, pơblih bơyan juăt amuñ biă hơmâo kman tơlơi ruă ƀă hyu, boh nik ñu kman tơlơi ruă djơ̆ hmơi”.

Ding jum ia jrao ăt rơkâo djop tơring čar, ƀôn prong khom sem lăng re se, kiăng pơtong glăi tong ten tơlơi pơhing djơ̆ hmơi, đing nao mrô mơnuih mă bruă, kiăng djop, pơhlôm brơi ia jrao, mơnong ƀong huă, prăk kăk, gơnam yua mă bruă kiăng pơtrut tañ ngă giong tlâ̆o pơgang vaccine, pơhlôm hlâo djơ̆ hmơi hăng kman čut ngă, khom tlâ̆o pơgang ngă giong amăng blan 3 anai mơtam.