Anih pơjrao ruă kraih mă glăi pran mơ̆ng Sang ia jrao plơi prong Buôn Ma Thuột hơmâo prăp lui 6 boh sưng đih hăng 5 boh sưng brơi mơnuih ruă kraih pơjrao ječ amăng hrơi Tê̆t. Ơi ia jrao Trần Thanh Qúy, Kơ-iăng khua Anih pơjrao tơlơi ruă kraih mă glăi pran, brơi thâo:“Anih pơjrao hơmâo prăp lui rim kip dŏ gak hơmâo 1 čô ơi ia jrao hăng 2 čô điều dưỡng laih anun dŏ gak 24/24 mơtăm, dưi pơgang glăi djŏp tơlơi truh sat tơdah hơmâo, biă ñu lĕ tơlơi ruă măt gơnam ƀong huă ăt kah hăng rơbuh rơbeč amăng hrơi tê̆t”.

Sang ia jrao prong Dap Kơdư, jing sang ia jrao prong hloh mơ̆ng kual Dap Kơdư, lêng kơ kjăp bruă čơkă mơnuih ruă kơtang. Ơi ia jrao Nguyễn Doãn Sơn, Kơ-iăng khua anih pơjrao ruă kraih brơi thâo, amăng hrơi tê̆t, mơnuih ruă nao pơjrao ječ amra đĭ rơbêh 50% pơhmu hăng hrơi pơkŏn, biă ñu lĕ tơlơi ruă rơbuh rơdêh, ruă arăt hơtai boh hăng tơtăng arăt dlô.

“Ƀing gơmơi amra prăp lui ƀing khua dŏ gak, hơmâo thim 1 kip čơkă mơnuih ruă kraih gah tơlơi ruă rơbuh rơbeč, rơka, 1 kip dŏ gak pơhrua tui, sa kip prăp lui hlâo đah mơ̆ng dưi djru pơjrao tơdah hơmâo tơlơi truh rơka rơkač, pơjrom pơtlă hơmâo lu mơnuih ruă. Rơngiao kơ anun, amra brơi 1 grup ơi ia jrao dŏ gak pơ Anih pơjrao ječ, tơdah hơmâo arăng iâu gơmơi amra pơkiăo nao 1 čô bác sĩ, 2 čô điều dưỡng nao djru mơtăm”.

Hrŏm hăng prăp hlâo mơnuih mă bruă, gơnam yau hăng ia jrao, Sang ia jrao prong Dap Kơdư ăt lăng yôm mơn bruă djru ba prăk kăk, juh alum pran jua ƀing duam ruă dŏ đih glăi pơ sang ia jrao amăng hrơi tê̆t. Ơi ia jrao Nguyễn Ngọc Thịnh, Kơ-iăng khua sang ia jrao brơi thâo:“Abih bang anih pơjrao gơmơi pơtă pơtăn laih anăm brơi pơdơi đơi ôh amăng hrơi tê̆t, pơƀut dŏ gak pơ sang ia jrao đah mơ̆ng wai lăng mơnuih ruă klă hloh, hơjăn anih pơjrao ječ ruă kraih khŏm dŏ gak hrơi mlăm mơtăm. Amăng hrơi tê̆t anai gơmơi brơi ngui ngor sang čơ tê̆t kơ mơnuih ruă tơnap tap, pơhmutu djru braih, ia luil, ia tơsâo rơmô kiăng ƀing duam ruă čơkă Tê̆t mơak ƀiă”.

Ƀu kơnong pơ hơdôm boh sang ia jrao gưl tơring čar đôč ôh, pơ sang ia jrao tơring glông hnun mơn, ăt hơmâo prăp lui tong ten kơ bơyan ƀong Tê̆t anai. Ơi ia jrao Lê Thị Thuỷ, Khua sang ia jrao prong tơring glông M’drăk, brơi thâo:“Ƀing khua git gai abih bang anih pơjrao, sang ia jrao să prăp lui wai lăng klă kơ mơnuih ruă pơ dua gưl sang ia jrao, hăng sang ia jrao prong tơring glông lĕ lăi pơthâo djŏp tơlơi bơdjơ̆ nao ia jrao, gơnam yua giong anun jao dŏ gak, pơhlôm brơi bruă pơjrao mơnuih ruă kraih amăng hăng tơdơi kơ hrơi Tê̆t”.

Kar kăi tui anun mơn, Sang ia jrao tơring glông Ea Súp, ơi ia jrao Nguyễn Viết Hữu, Khua sang ia jrao ăt pơsit mơn:“Ƀing gơmơi ƀu brơi ôh mơnuih pơdơi mă bruă rơnuč thun hăng amăng hrơi Tê̆t, pơhlôm hơmâo djŏp mơnuih dŏ gak, khăm pơjrao mơnuih ruă amăng hrơi Tê̆t”.

Anom bruă ia jrao Dak Lăk prăp lui mơ̆ng sang ia jrao tơring čar truh pơ tơring glông, pơhlôm khăm pơjrao tơlơi ruă hăng pơjrao mơnuih ruă kraih. Ơi ia jrao Nguyễn Hữu Vũ Quang, Kơ-iăng khua gơnong bruă ia jrao lăi pơthâo:“Gơnong bruă ia jrao hơmâo hră mơ-it kơ abih bang anom bruă, prăk lui mơnuih mă bruă, gơnam yua, prăp lui djŏp ia jrao mơ̆ng sang ia jrao tơring glông truh pơ tơring čar. Anom bruă ia jrao prăp lui laih bruă čơkă abih bang mơnuih ruă nao pơ sang ia jrao amăng hrơi Tê̆t. Gak tê̆t kar hăng gak guai dêh čar mơn”.

Hăng tơlơi prăp rơmet klă, gơgrong bruă mơ̆ng ƀing ơi ia jrao, anom bruă ia jrao Dak Lăk prăp lui laih djŏp bruă đah mơ̆ng dưi pơgăn tơlơi truh hơmâo amăng hrơi Tê̆t. Mah pơjrao ječ ƀudah wai lăng mơnuih ruă đôč, ơi ia jrao lêng kơ abih pran jua, ba glăi sa bơyan ƀong Tê̆t rơnuk rơnua, pơđao pran mơnuih ƀôn sang.