Ơi ia jrao Nguyễn Thị Mới, Khua Anom pơjrao tơlơi ruă kual pơhang pơ-iă, Sang ia jrao pơjrao tơlơi ruă čơđai muai tơring čar Gia Lai brơi thâo, Anom hmâo 40 bôh sưng kơ mơnuih ruă samơ̆ hơdôm hrơi rơgao mrô mơnuih djơ̆ hmơi đĭ tañ, djơ̆ hrơi ñu lu truh rơbêh kơ 100 bôh sưng kơ čơđai djơ̆ hmơi đĭh hrŏm pơjrao ba truh rơgao hơnong pơkă. Mrô čơđai djơ̆ hmơi đĭ tañ biă ñu yua kơ bơyan djơ̆ kơman tơlơi ruă lu, hrŏm hăng anun, lu cơđai muai akă klâ̆o vaccine pơgang hlôm hlâo ƀudah klâ̆o laih akă djop mrô pơkă ngă đĭ lu tơlơi ruă hăng ngă tơlơi ruă amra kơtang đĭ hloh hăng ƀing čơđai pơkon.

 “Tơlơi ruă djơ̆ hmơi năng ai ñu 3 blan hăng anai hmâo gru nam đĭ, djơ̆ hrơi hơnong ñu amăng anom pơjrao hmâo truh 100 čô mơnuih ruă, hmâo hrơi đa khom đih tom dua čô sa bôh sưng, mă tŭ dong sưng gah rơngiao, ơi ia jrao khom pơđĭ mông mă bruă kah hăng lu hloh dua wot, biă ñu amăng tal tết glêh glar biă” – Ơi ia jrao Nguyễn Thị Mới brơi thâo tui anun.

Bơwih brơi ană 14 blan pơjrao tơlơi ruă ƀơi  Anom pơjrao tơlơi ruă kual pơhang pơ-iă, amai Rah Lan Tuyết, plơi T’nung, să H’bông, tơring glông Čư̆ Sê brơi thâo, mô̆ anet akă klâ̆o pơgang hlôm hlâo tơlơi ruă djơ̆ hmơi anun lơm ruă jing ruă kraih hloh kơ čơđai pơkon. Truh ră anai, ñu hmâo pơjrao 3 hrơi laih, ră anai tơlơi suaih pral hơđong hloh laih.

 “Ană kâo ruă 7 hrơi pơ̆ sang ƀu hlao pơ-iă anun ba rai pơ̆ sang ia jrao tơring glông 7 hrơi lĕ ba nao pơ̆ sang Sang ia jrao pơjrao tơlơi ruă čơđai muai pioh lăng tui. Ră anai dưi ƀong huă, men amĭ, suă jua rơnang hloh, pơtuk ăt dô̆ mơn, ruă čroh kian lĕ hơdôm hrơi ƀu hmâo dong tah”.

Lăp bơngot lĕ čơđai lar tưp bơrơkua nao rai ƀơi hơdôm bôh sang ia jrao. Amai Yao, dô̆ ƀơi grŭp mơnuih ƀôn sang mrô 8, tơring kual Đăk Đoa, tơring glông Đăk Đoa hmâo ană 5 blan hmâo tơlơi ruă pơplih bơbrah kơsô̆ kraih ruai glăi:

 “Ñu rai pơ̆ anai mơ̆ng lơ 2 Tết, hlâo kơ anun ñu ruă bơbrah kơsô̆ ba nao pơ̆ Sang ia jrao tơring glông Đăk Đoa pơjrao hmâo sa rơwang hrơi tơjuh. Yua kơ amăng tơring glông hmâo čơđai ruă djơ̆ hmơi lơm mut đih amăng anih pơjrao hrŏm anun jing ƀă djơ̆”.

Mơ̆ng akô̆ thun truh ră anai, Sang ia jrao pơjrao tơlơi ruă čơđai muai tơring čar Gia Lai tŭ mă pơjrao giăm truh 500 čô čơđai ba nao pơ̆ sang ia jrao yua kơ djơ̆ hmơi, đĭ lu kah hăng lu biă bơhmu hăng thun 2024. Ơi ia jrao Từ Mai Linh, Kơ-iăng Khua Sang ia jrao brơi thâo, mơ̆ng tơlơi pơtă gah Ding jum ia jrao, sang ia jrao hmâo prăp lui mơnuih mă bruă, gơnam tam, hơdôm anih kah đuăi ƀơi hơdôm anom pơjrao pioh thâo krăn tơlơi ruă djơ̆ hmơi hăng pơjrao klă hloh.

 “Sang ia jrao ăt pơpha laih mơn, dưm dăp glăi hơdôm tơlơi ruă ƀơi anih hyu hyiăng pơ-iă phara, dưi đih anih phara ha jăn pioh pơhlôm huăi lar tưp hyu. Pơđĭ mrô mơnuih mă bruă, prăp lui gơnam tam măi mok pioh suă pran, Cpap pioh pơjrao mơnuih ruă klă hloh. Lơm thâo čơđai pơ-iă drơi jăn, pơtuk, ƀlĕ ia adung, ƀlĕ pơđeh mriah bơdjơ̆ nao ruă djơ̆ hmơi thơ sang anô̆ khom nao pơ̆ hơdôm anih anom ia jrao pioh dưi pel ĕp lăng, lăi pơthâo, pơjrao lăp djơ̆, bruă klâ̆o pơgang hlôm hlâo djơ̆ hmơi ăt yôm phăn mơn hăng čơđai pơphun klâ̆o pơgang mơ̆ng 9 blan, klâ̆o djơ̆, djop tui tơlơi pơkă mơ̆ng Ding jum ia jrao”./.