Ƀơi tơring čar Kon Tum mrô mơnuih ruă djơ̆ hmơi lu tui, gơnong bruă ia jrao ƀôn lan glăk kơtưn bruă pơgang tơlơi ruă djơ̆ hmơi, amăng anun ba tơbiă hơnong pơkă pơgiong bruă tlâ̆o vaccine brơi 95% kơ ƀing kiăng tlâ̆o pơgang, amăng blan 3 rơwang hrơi tơjuh anai, tui tơlơi git gai mơng Kơnuk kơna hăng Ding jum ia jrao. Giăm 3 blan rơgao gơnong bruă ia jrao tơring čar Kon Tum hơmâo 728 čô mơnuih ruă djơ̆ hmơi hăng ƀing him lăng ruă djơ̆ hmơi đĭ 722 čô mơnuih pơhmu tui tơđar thun hlâo.

Ngă tui tơlơi git gai mơng Kơnuk kơna hăng Ding jum ia jrao, hrŏm hăng bruă pơtrut kơtang pơtô pơblang tơl plơi pla ataih, asuek, kual mơnuih djuai ania ƀiă, gơnong bruă ia jrao tơring čar Kon Tum glăk pok pơhai bruă tlâ̆o vaccine pơgang pơgăn tơlơi ruă djơ̆ hmơi. Ơi ia jrao CK II Đỗ Ngọc Hoà, kơ-iăng khua gơnong bruă ia jrao tơring čar Kon Tum brơi thâo, gơnong bruă ia jrao ƀôn lan glăk pơtrut tañ bruă tlâ̆o vaccine, gir run pơgiong tlâ̆o brơi 95% kơ ƀing kiăng tlâ̆o pơgang amăng blan 3 mơtăm.