Dŏ djă akhăn uă hĭ ia mơta kơ ană ruă nuă dŏ đih ƀơi sưng pơjrao tơlơi ruă, lăng ƀơi ƀô̆ mơta rơka tit tut djơ̆ mlăi pơtuh ngă, ƀơi tơngan rơka ƀiă abih laih anun tơl trơ̆i lui hĭ ƀơi atŭt čơđeng tơngan ania hăng čơđeng pơčrâo hnun mơ̆n, pran jua amai Trần Thị Thu Hằng dŏ ƀơi să Tam Giang, tơring glông Krông Năng, tơring čar Dak Lak kah hăng ƀlĕ drah amăng lăm hơtai boh. Ƀing ơi ia jrao pơjrao tơlơi rơka rơkač, pơhiam glăi drơi jăn, Sang ia jrao prong kual Dap Kơdư tŭ jum pơjrao brơi, nam rơka jăng jai hơđong ƀiă laih, samơ̆ tơlơi truh yua nam rơka mơ̆ng mlăi pơtuh ngă rai kơ ană bă, ngă kơ pran jua amĭ ñu hŭi bral hơngal na nao đôč.

“Lơ̆m hmư̆ mlăi pơtuh, hơmâo mơnuih ƀôn sang djru hrŏm nao ba brơi pơ sang ia jrao, iâu telephôn kơ ta, hlăk anun kâo tơl djai hơngol mơ̆n. Ơi ia jrao lăi, tơngan nô khom trơ̆i lui hĭ dua ƀĕ čơđeng, pran jua kâo hlăk anun kah hăng tơ̆i pruăi lu črăn mơtam yơh, ta jing amĭ ƀu thâo ngă hơgĕt ôh pơhrua tŭ mă tơlơi ruă pơ ala brơi kơ ană ta”.

Amai Nông Thị Tiên, amĭ amôn Trần Nhật Phong, dŏ ƀơi să Gla, tơring glông Dak Mil, tơring čar Dak Nông, ăt phrâo găn rơgao sa tơlơi kơtuă hnun mơ̆n. Phong ană ñu hăng ƀing gơyut pơkra mă mlăi pơtuh, giong anun ba glăi pơ sang dơlôn hĭ pơjing mlăi. Yua put pơtuh djrưh pơsah, gơñu dưm amăng gŏ gang hna glăi brơi thu, lơ̆m pĕ apui jă, put anun hloh pơtuh ba truh hơmâo tơlơi truh sat hăng jua pơtuh kơtang biă mă.

“Kâo ăt thâo laih tơlơi hŭi rơhyưt mơ̆ng mlăi pơtuh, glăi pơ sang kâo hơmâo pơtă pơtăn lu wơ̆t laih hăng ană bă samơ̆ ƀu hmư̆ hiăp ƀơ̆i. Lơ̆m hrơi ñu hơmâo tơlơi truh, lăng ƀô̆ mơta ñu hŭi biă mă, tơl ƀu khin lăng, ƀu pơmin ôh ñu djơ̆ mlăi pơtuh kơtang djơh hăng anun”.

Nam rơka ƀơi tơngan hăng ƀơi ƀô̆ mơta ƀing čơđai anun, amra grăng tui mơ̆n, samơ̆ hơgĕt ruă amăng lăm pran jua, ai hơtai adih anun ƀu thâo abih ôh. Hăng ƀing čơđai muai, tơlơi truh djơ̆ mlăi pơtuh ƀu kơnong kơ nam rơka yua kơčung đôč ôh, dŏ pioh glăi tơlơi rơka amăng pran jua, tơlơi pơmin prô̆ tơdăm prăm dra ƀa tơsâo tơdơi anai lăng hyu tơlơi hơdip mơda jum dar ƀing ta. Amôn Hoàng amăng hơdôm hrơi pơjrao nam rơka ƀơi sang ia jrao, ăt ƀuh hăng hŭi laih mơ̆ng tơlơi hŭi rơhyưt mlăi, ƀơt pơtuh ngă.

“Kâo lăng amăng Tiktok hăng čih tơlơi pơhing mơ-it blơi put pơtuh giong anun ba glăi lŭk put. Kâo tuh tal klâo ñu hlong pơtuh mơtam. Ơi ia jrao tlâ̆o hăng sut nam rơka ruă đơi, kâo hơƀlơ̆k biă mă kơ bruă ngă ngor mlăi anai”.

Bơ anai, pran jua tơlơi pơmin mơ̆ng amôn Phong glăk ruă nuă rơka rơkač yua mlăi pơtuh ngă:

“Ră anai tơngan bơbrah ruă biă mă, kơčung ƀlĕ ia, ƀô̆ mơta ăt ruă mơai. Kâo hŭi yơh, yua kâo aka ƀu thâo ôh anŏ hŭi rơhyưt mơ̆ng put jrao mlăi pơtuh ngă”.

Ơi ia jrao Nguyễn Minh Trực, Khua anom pơjrao nam rơka pơhiam glăi drơi jăn Sang ia jrao prong kual Dap Kơdư kah pơpha, lu wơ̆t tơlơi truh yua mơ̆ng mlăi pơtuh ngă, hơmâo na nao amăng bơyan pơdơi prong hăng akŏ thun phrâo, ngă yang ƀong têt, ƀing čơđai yơh djơ̆ lu. Rim thun, Anom pơjrao rơka hơmâo tŭ jum 20 čô mơnuih rơka yua djơ̆ mlăi pơtuh ngă. Nam rơka, kơčung djơ̆ mlăi pơtuh, apui ƀong kơtang biă mă, tơ̆i čơđeng, djơ̆ mơta bum mơta mơ̆n. Lu nam rơka yua put jrao, anŏ pơtuh ngă, ƀing čơđai pơkra ming mă pô, jai hŭi kơtang hloh, yua kơ jrao pơtuh anun mut tơma ngă sat amăng lăm drơi jăn, khom brač pơjrao sui biă mă grăng.

“Mlăi pơtuh arăng pơhmu kah hăng nam rơka djơ̆ put jrao apui ƀong kơtang biă mă. Đơ đam djơ̆ tơngan khom trơ̆i čơđeng, plă tơngan ƀu hlom hrup blung a ôh, pioh glăi nam rơka, pơtut, pơtông abih tơlơi hơdip ƀing čơđai. Sang anŏ, mơnuih mơnam ăt khom đing nao kơ ƀing čơđai, yua tơlơi ruă nam rơka rơkač hŭi rơhyưt hrup anai sat biă mă”.

Tơlơi truh yua mlăi pơtuh ƀu djơ̆ tơlơi hơmâo mơ̆ng sa boh sang anŏ hlơi đôč ôh, amăng lu sang anŏ ƀơi Dak Lak ƀudah amăng mơnuih mơnam ăt hnun mơ̆n. Tơlơi ră ruai kơ ƀing hơmâo tơlơi truh ruă nuă, ƀing tŭ tơlơi ruă anun jôr biă mă, sa tơlơi pơhŭi kơ kơtang biă mă kiăng abih bang thâo hluh rơđah pơhlôm pơgang tơlơi truh sat kơ ƀing čơđai muai; rim čô khom răng kơđiăng mă laih anun gơgrong ba kơ drơi jăn pô hăng mơnuih amăng sang anŏ kiăng huăi hơmâo tơlơi truh sat kơñ hơƀlơ̆k glăi ƀu hmao dơ̆ng tah.