Anom bruă git gai mơ̆ng Gơnong dlông hơmâo akŏ pơdong 5 grup hyu pel ĕp hơduah tơna mơ̆ng gơnong dlông truh pơ gưl să amăng bơyan Tê̆t thun phrâo Ất Tỵ hăng mông ngui ngor bơyan bơnga 2025. Laih dong kiăng hơdôm tơring akŏ pơdong grup hyu hơduah ĕp mơ̆ng gưl prong truh pơ plơi pla pơ să. Iâu pơthưr abih anom bruă pôr pơhing gum pơtô lăi tơlơi phiăn hơdjă mơnŏng ƀong huă ăt kah hăng bruă ruah, djă pioh, pơkra gơnam ƀong, ƀong gơnam kiăng ană plơi ñu thâo. Tui hăng Ding jum ngă hmua hăng pơđĭ kyar ƀôn lan, hrơi Tê̆t jing hrơi blơi gơnam lu hloh, biă ñu mơnŏng akan, Ding jum hơmâo ngă hrŏm hăng hơdôm anom apăn bruă kơnuk kơna akŏ pơdong 9 grup hyu hơduah ĕp anih juăt sĭ tă mơnŏng, sem lăng anŏ hơdjă hlô mơnŏng ƀơi 17 boh tơring čar, ƀôn prong biă ñu wai lăng kjăp mơnŏng blơi mơ̆ng čar rơngiao, amăng anun lăng yôm 3 mơta bruă anun lĕ klin kheng, hơdjă mơnŏng ƀong huă hăng ĕp ƀuh anih pơkra gơnam. Ơi Tống Xuân Chinh, Kơ-iăng khua anom bruă wai lăng anih rông hlô, Ding jum ngă hmua hăng pơđĭ kyar ƀôn lan brơi thâo:“Hăng pŭ hlô ră anai gơmơi pơmin dưi pơhlôm hơmâo djŏp mơnŏng akan, boh mơnŭ bip pioh yua amăng rơnuč thun, amăng hrơi ngui ngor, biă ñu amăng hrơi tê̆t thun phrâo. tui anun Ding jum bruă hmua hăng pơđĭ kyar ƀôn lan kiăng hơdôm boh tơring čar ƀôn prong git gai hơdôm anom apăn bruă, gong gai ngă hrŏm lăi pơthâo tơlơi phiăn hơdjă rơnuk rơnua gơnam ƀong, tơlơi truh ba glăi mơ̆ng bruă mă yua jrao măt, rơngiao amăng anăn kơnuk kơna brơi mă yua mơ̆ng blung a, pơhrui gơnam, djă pioh, pơkra gơnam mơ̆ng hmua, kyâo hăng akan hơdang...”

Ƀơi plơi prong jưh jom Hà Nội, Anom git gai mrô 389 ƀôn prong Hà Nội brơi thâo, hơmâo pơtrun tañ laih hră pơhlôm hơdjă mơnŏng ƀong huă amăng bơyan Tê̆t Ất Tỵ hăng mông ngui ngor bơyan bơnga 2025. Jơnum min mơnuih ƀôn sang ƀôn prong Hà Nội hơmâo akŏ pơdong 4 grup hyu pel ĕp anŏ hơdjă rơnuk rơnua mơnong ƀong amăng ƀôn prong. Phun ñu lĕ sem lăng pơ hơdôm anih pơkra, sĭ mơdrô, blơi mut gơnam tam mơ̆ng čar rơngiao, hơdôm mơta gơnam hơmâo mă yua lu amăng hrơi Tê̆t, hăng amăng abih bơyan ngui ngor. Ƀơi tơring glông, tơring kual amra akŏ pơdong grup pel ĕp ngă tui bruă pơhlôm hơdjă gơnam ƀong bơwih amăng bơyan tê̆t ƀơi hơdôm boh să phường, tơring kual. Ơi Đoàn Thanh Phong, Khua anom bruă wai lăng hơdjă gơnam ƀong huă ƀôn prong Hà Nội brơi thâo:“Hăng akŏ bruă pơhlôm rơnuk rơnua hơdjă gơnam ƀong amăng hrơi blan anai, biă ñu amăng hrơi tê̆t, hrơi ngui ngor ngă yang rơbang lĕ Grup pel ĕp nao sem lăng pơ hơdôm boh sang sĭ mơdrô pơkra gơnam ƀong, laih anun amăng mông pel ĕp tơdah ƀuh anih ngă soh lĕ gơmơi amra pơsir mơtăm, laih dong kiăng anih sĭ mơdrô anun khŏm hla tui. Bơ hăng hơdôm boh sang sĭ mơdrô ngă tui djơ̆ tơlơi phiăn lĕ gơmơi bơni, pơtrut pran jua kiăng gơñu ngă tui na nao”.

Wai lăng kjăp anih sĭ mơdrô gơnam bơwih amăng bơyan tê̆t hăng abih bơyan ngui ngor ngă yang, mơnuih wai lăng anih sĭ mơdrô amăng dêh čar ta hơmâo lăi pơthâo tañ yơh Akŏ bruă thun blan pơgăn sĭ mơdrô gơnam tam ča čot amăng bơyan Tê̆t thun phrâo Ất Tỵ 2025; ngă kơtang hloh bruă pel ĕp, wai lăng anih sĭ mdrô hăng bơtơhmal mơtăm tơdah hơmâo tơlơi soh kah hăng pioh lui gơnam kiăng sĭ pơmă, tĕp nua, sĭ mơdrô tui glông điện tử, sĭ mơdrô, pơdŭ pơgiăng gơnam, djă pioh gơnam kơnuk kơna kŏm mă yua, gơnam blơi mơ̆ng čar rơngiao ƀu hơmâo hră pơ-ar, gơnam arăng pơkra mă ča čot, gơnam dŏp mă tơlơi rơgơi mơ̆ng arăng, gơnam ƀu klă, lăp đing nao gơnam juăt yua, gơnam arăng juăt blơi lu amăng rơnuč thun hăng amăng bơyan Tê̆t. pơtrut bruă wai lăng pep ĕp rơnuk rơnua rơnuk rơnua gơnam ƀong mơ̆ng bruă pơkra, truh kơ blơi yua; khut khăt pơgăn hăng bơtơhmal mơtăm hơdôm anih ngă soh, pô ngă soh tơlơi phiăn rơnuk rơnua hơdjă gơnam ƀong.

Ơi Nguyễn Quang Huy, Kơ-iăng khua wai lăng abih bang bruă, bruă prăk kăk, Anih phun wai lăng bruă sĭ mơdrô, Ding jum tuh tia pơkra gơnam brơi thâo: mơnuih wai lăng anih sĭ mơdrô amra ngă hrŏm kjăp hăng hơdôm anom apăn bruă hăng gong gai wai lăng kjăp gơnam blơi mut mơ̆ng bah amăng jang.

“Hăng hơdôm mơta gơnam giăm guai dêh čar lĕ mơnuih wai lăng anih sĭ mơdrô ngă hrŏm kjăp hăng tơhan apăn bruă pơ bah amăng jang guai pơphun pel ĕp pơgăn hĭ bui mơnŭ blơi ča čot mơ̆ng čar rơngiao, tui jơlan hăng kơdư, jơlan ia rơsĭ, jơlan rơdêh por pơgiăng mut amăng dêh čar. Bơ amăng dêh čar, mơnuih wai lăng anih sĭ mơdrô pơbhut pel ĕp sem lăng gơnam tam pơ hơdôm boh sang sĭ mơdrô prong, sang čơ juăt blơi gơnam sĭ glăi, sang čơ mơnuih ƀôn sang juăt nao...lăng klă bruă tĕp nua, sĭ djơ̆ tui nua tĕp...Pơgăn bruă sĭ mơdrô gơnam ča čot ƀơi plang internet”.

Wai lăng kjăp bruă hơdjă mơnŏng ƀong huă bơyan Tê̆t thun phrâo Ất Tỵ 2025 hăng mông ngui ngor ngă yang thun 2025, tơlơi gơgrong bruă mơ̆ng plơi pla yôm biă. Biă ñu, hơdôm anih pơkra, sĭ gơnam ƀong huă pơkra mơ̆ng đang hmua amuñ ngă măt hloh, tơlơi kiăng blơi amăng bơyan ngui ngor bơyan tê̆t mơ̆ng ană plơi pla. Hơdôm tơlơi soh gah mơnŏng ƀong huă khŏm hơmâo pơsir hlao mơtăm, bơtơhmal kiăng gơñu hŭi, thâo hluh, lăi pơthâo rơđah amăng djŏp glông pôr pơhing mơtăm djơ̆ tui tơlơi phiăn. Rim čô mơnuih ƀing ta ăt khŏm thâo pơmin, thâo ruah mă gơnam klă đah mơ̆ng pơhlôm tơlơi suaih pral kơ pô ta, kơ sang anŏ, hrŏm hăng lŏn ia ta čơkă bơyan bơnga truh mơ-ak mơ-ai.