VOV4.Jarai - Mơguah lơ 4/5, ƀơi tơdron rơdêh por jar kmar Watay, plơi prong jưh jom Vientian, hơmâo pơphun Jơnum brơi gơnam mơng Ping gah, Kơnuk kơna hăng Mơnuih ƀon sang Việt Nam djru kơ Ping gah, Kơnuk kơna hăng Mơnuih ƀon sang dêh čar Lao pơgang klin Covid-19. Pơhiăp ƀơi mông jơnum, Kơ-iăng khua ding jum pơtom hiăp ơi Tô Anh Dũng pơsit Việt Nam lêng dŏ mring, jê̆ giăm, djru ba dêh čar Lao, laih anun djru ba amăng mông hơmâo klin Covid-19. Đăo gơnang tơlơi git gai lăp djơ̆ mơng Ping gah, Kơnuk kơna hrŏm hăng tơlơi gum pơgôp ha pran mơng hơdôm anom apăn bruă, abih bang mơnuih ƀon sang, dêh čar Lao amra tañ dưi pơgang klin Covid-19, rŭ glăi tơlơi bơwih ƀong huă - mơnuih mơnam laih dong pơđĭ kyar kơjăp phik. Kơ-iăng khua dêh čar Lao, Kikeo Khaykhamphithun ăt lăi mơn, Việt Nam lĕ dêh čar blung a djru prăk kăk, pơkiăo nao ƀing rơgơi kơhnâo nao djru, djru ba gơnam yua gah ia jrao djru kơ dêh čar Lao pơgang glăi hăng klin hơđuh đĭ amăng tal anai. Anai lĕ tơlơi pơsit rơđah gru grua ngă giăng mah pŭ ƀăn kơplah wah Lao - Việt Nam, Việt Nam - Lao.

Siu H’Mai: Pơblang