VOV4.Jarai - Lơ 6/4, Ding jum ling tơhan pơphun Jơnum lăng nao rai amăng tivi anai lĕ jơnum lok 14 Grup khua mua djru bruă pơgang rơnuk rơnua rơwang 4, mơng thun 2021-2023 amăng hơdôm jơnum Ding jum ling tơhan kual ASEAN pơhư prong. Đại tá Mạc Đức Trọng, Khua grup khua mua djru bruă pơgang rơnuk rơnua Việt Nam hăng yă Matsuzawa Tomoko, Khua grup khua mua djru bruă pơgang rơnuk rơnua Japan, gum git gai hrŏm mông Jơnum anai. Jơnum tŏ tui pơdah tơlơi gơgrong, tơlơi đăo gơnang, kơdrưh, thâo gum pơgôp mơng dêh čar Việt Nam amăng hơdôm hơdră bruă djop bơnah djru pơgang rơnuk rơnua mơng Sang gum hơbit djop dêh čar amăng kual.

Anai ăt lĕ hrơi mông kiăng pơlăi nao rai tơlơi thâo thăi, tơlơi găn rơgao kơplah wah hơdôm dêh čar ding kơna hăng Sang gum hơbit djop dêh čar kiăng pơtrut đah gơmơi djru hrŏm amăng bruă pơgang rơnuk rơnua. Đại tá Mạc Đức Trọng brơi thâo: Jơnum khua ding jum ling tơhan kual ASEAN pơhư prong hơmâo pơgôp prong prin amăng bruă ngă hrŏm pơgang rơnuk rơnua, hơđong, pơđĭ kyar amăng kual hăng rŏng lŏn tơnah.

Siu Đoan: Pơblang