VOV4.Jarai - “Việt Nam hơmâo ngă hăng glăk pơtrut ngă sit hơdôm tơlơi ƀuăn hăng tơlơi pơčeh phrâo hơmâo ba tơbiă amăng thun 2020, amăng anun gơñăm ngă hơmâo bruă kiăng ngă hlâo hăng kiăo tui akŏ bruă mơng thun ASEAN 2021 hơmâo Brunây Đa-rút-sa-lam ba tơbiă”. Anai lĕ tơlơi hơmâo Kơ-iăng khua ding jum wai lăng mơnuih mă bruă tơhan rơka hăng mơnuih mơnam Nguyễn Bá Hoan ba tơbiă ƀơi mông Jơnum Khul wai lăng boh thâo - mơnuih mơnam (ASCC) tal 25 hơmâo pơphun pơbưp lăng nao rai amăng tivi yua dêh čar Brunây git gai. Ƀơi dêh čar Việt Nam, hăng tơlơi gơgrong ngă Anom bruă git gai mông Jơnum Khul wai lăng Boh thâo gru grua - Mơnuih mơnam ƀơi Việt Nam, Kơ-iăng khua Ding jum Mơnuih mă bruă Tơhan rơka hăng Mơnuih mơnam Nguyễn Bá Hoan brơi thâo: Việt Nam čang rơmang abih bang 15 anom bruă mơng Kual Boh thâo gru grua - Mơnuih mơnam ASEAN pơtrut ngă hrŏm tŭ yua hloh amăng bruă akŏ pơjing hăng ngă pơgiong djŏp akŏ bruă hơmâo jao amăng thun 2021-2025, hơmâo yap nao abih bang tơlơi pơplih phrâo rơnuk anai, laih anun tơlơi ƀing ta kiăng ngă hlâo lĕ pơgang klin hăng rŭ glăi tơlơi bơwih ƀong tơdơi kơ abih klin, pơsir hơdôm tơlơi bơbeč yua ană mơnuih jai hrơi tha tui, pơplih ayuh hyiăng hăng tơlơi hơkrŭ boh thâo 4.0.

Siu H’Mai: Pơblang