Nđờ nam lài, ồng Briu Chéo, kòn cau Cơ Tu ơm tàm sàh tiah bơnơm Bến Giằng, ƀòn dờng Đà Nẵng (kơnhoàl Nam Giang, càr Quảng Nam yau) uă ngan là lơh mìr, lơh ơpah tơl broă tơn mơya rài kis kung gam rƀah lơ ời sùm. Ồng Briu Chéo neh càn priă anih priă jền dê rlau 200 tơlak đong, geh gơnoar atbồ ƀòn lơgar dong kờl sơntìl chi tam, phan ròng, ồng Briu Chéo rề ơnàng wàng ròng phan nàng ròng kơnrồ, sur, tam tờm chi sa plai. Tŭ do, suơn dờng ồng Briu Chéo dê geh uă ngan cau tus sền nàng bơsram. Hìu bơnhă lơi tàm thôn, ƀòn gơtìp kal ke den ồng Briu Chéo tŭ lơi kung crăp rơcang dong kờl lơm: “Hìu bơnhă añ geh càn priă sa priă cồng lơyah den tàng bơcri priă bơtàu tơnguh lơh sa dong hìu bơnhă kơ̆ kơljap mờ bơtàu tơnguh rlau, rài kis hìu bơnhă neh bơtàu tơnguh rlau mờ lài. Mờr tus kung kơp kờñ gơnoar atbồ ƀòn lơgar lơh gơlik bơta ƀuơn, dong kờl priă càn, bơta chài sơngka sền gròi, ròng phan tàm broă bơtàu tơnguh lơh sa. Làng bol ƀòn lơgar hìu bơnhă lơi kờñ den añ kung bơto bơta chài lơh sa khi in nàng khi geh tŭ niam bơtàu tơnguh lơh sa mờ lơh gơlik bơta niam dong làng bol geh tai broă lơh”.

Bi Bhnướch Thị Blắc, kòn cau Cơ Tu ơm tàm sàh A Vương, ƀòn dờng Đà Nẵng, gơwèt kơnhoàl Tây Giang, càr Quảng Nam yau deh tàm hìu bơnhă kal ke. Ngai kup bau mờ lik ơm is, bi tàm bơyai mờ bơkau pờ hìu tac phan ngui sa pal geh, tac làng bol tàm thôn in. Kơnờm prap gàr priă jền, bi leng càn tai anih priă jền, bơcri priă ròng phan mờ tam chi sa plai. Tus tŭ do, bi Blắc neh tam rlau 2 lồ tờm kruăc Vinh, mờ 800 tờm mờ plai bung kơmhồ tơlir, lơh geh priă jền git nđờ jơt tơlak đong dùl kàl. Ngui ù suơn tiah dòr mờ phan siam phan ròng geh lờs tơn, bi Blắc lơh wàng ròng sur, iar mờ bơcri priă tam brê dơm chi dờng.

Hìu bơnhă bi Blắc neh lik klàs rƀah mờ geh priă jền prap tềm pềr, lơh geh hìu dờng niam, blơi rơndeh oto lòt lơh sa. Bi Bhnướch Thị Blắc gam ai geh broă lơh uă cau lơh broă rƀah tàm ƀòn lơgar in, lơh geh priă jền sùm. Tơnơ̆ kờp jơh priă tă, pah nam, hìu bơnhă bi Blắc geh priă cồng bơh broă lơh sa mờr 200 tơlak đong: “Lài do, hìu bơnhă kal ke, bơh tŭ geh Anih priă jền dong kờl cau rƀah dong kờl ai càn priă hìu bơnhă añ rề ơnàng tai ală broă lơh bè tam kruăc mờ tam tờm keo mờ ròng phan, bơh hơ̆ rài kis hìu bơnhă bơtàu tơnguh. Tŭ do, rài kis kơ̆ kơljap, priă lơh geh kung uă đau sơl. Tơnơ̆ do, ùr bơklau kờp dŭ càn tai priă nàng bơtàu tơnguh broă lơh ơnàng rlau”.

Nàng lơh gơlik bơta niam làng bol in bơtàu tơnguh lơh sa, tơnguh priă lơh geh, gơnoar atbồ sàh A Vương dong kờl sơntìl chi tam, phan ròng, dong kờl làng bol bơtàu tơnguh lơh sa. Ồng Lưu Văn Khương, Phó Chủ tịch Anih duh broă Làng bol sàh tiah nhàr lơgar A Vương, ƀòn dờng Đà Nẵng pà git, ƀòn lơgar sùm git nền broă lơh tơrmù rƀah là kơnòl broă chính trị, lam lơh kràñ cê ală gùng dà, broă lơh dong kờl Dà lơgar, ƀòn dờng dê nàng hòi jà, dong kờl làng bol lam lơh tơn jơh jơgloh, tơrmù rƀah: “Uă hìu bơnhă neh khin cha càn priă nàng rê ơnàng broă lơh sa, geh uă hìu bơnhă gơ gơs là hìu bơnhă lơh sa, kă bro jak. Pơn rơ bè hìu bơnhă bi Blắc, hìu bơnhă bi Khánh, hơ̆ sồng bàr pe hìu bơnhă tàm ală thôn ndai. Ƀòn lơgar lơh gơlik bơta niam, dan mờ anih priă jền dong kờl cau rƀah, anih priă jền broă lơh sa suơn sre tơnguh priă càn nàng làng bol geh priă jền gàr niam broă dong kờl bơtàu tơnguh lơh sa”.

Ƀòn dờng Đà Nẵng tŭ do geh rlau 50 rbô hìu bơnhă làng bol lơh sa jak, tàm hơ̆ geh uă krơh pơn rơ jak là làng bol kòn cau Cơ Tu. Pah nam, Mpồl cau lơh broă sa ƀòn dờng Đà Nẵng pơgồp bal mờ ală gah broă lơh, ƀòn lơgar, Anih priă jền dong kờl làng bol càn priă sa priă cồng lơyah, tac sơntìl chi tam, phan ròng, dong cau tàm mpồl bơtàu tơnguh lơh sa. Uă hìu bơnhă làng bol là làng bol kòn cau Cơ Tu neh khin cha bơcri priă bơtàu tơnguh lơh sa hìu bơnhă, pơgồp bơnah bơt bơtàu ƀòn lơgar pa.