Nhai 8 pa do, mpồl tơrgùm bal 4 hìu măi ồs đèng càl Cư̆ Né 1, Cư̆ Né 2, krông Búk 1 mờ Krông Búk 2, kờp jơh bơta pràn 200MW, tàm sàh Krông Búk mờ Cư̆ Pơng, càr Dăk Lăk neh lơh gơs broă lơh pờ tơlik ồs đèng tàm ală tuabin dŭt ndơl. Tơnơ̆ mờ tŭ ai ngui lơh broă, ală rơndăp broă lơh do ờ mìng bơtơl ồs đèng kloh mờ gam lơh geh tai priă uă ngan ai càr in. Ồng Trần Quốc Tuấn, Chủ tịch Anih duh broă Làng bol sàh krông Búk pà git, ală rơndăp broă lơh gơtùi pơgồp bal tàm kes priă sàh dê rơlao 115 tơmàn đong pah nam, mờ ai geh broă lơh mờ pờ geh ù tiah bơtàu tơnguh pa. “Rơndăp broă neh pơgồp bal ai sàh in bè khà priă uă ngan pơn drờm mờ ală rơndăp broă tàm ală gah broă krơi is tàm sàh dê. Tiah bơtàu tơnguh bơh ală rơndăp broă lơh ồs đèng càl tàm Krông Búk gam uă ngan. Bol añ gam 4, 5 rơndăp broă lơh gam geh rơndăp ù tiah kờñ hòi jà bơcri priă nàng lơh geh priă pơgồp bal tàm broă bơtàu tơnguh lơh geh 2 sồ ai sàh in”.

Do kung là bơta pràn uă ngan càr Dăk Lăk dê tàm broă bơtàu tơnguh năng lượng lơh geh wơl. Jăt broă rơndăp ù tiah geh ai tơngai bơh nam 2025 tus 2035, càr geh 125 rơndăp broă lơh năng lượng lơh geh wơl, tàm hơ̆ geh 57 rơndăp broă lơh ồs đèng càl, kờp jơh bơta pràn mờr 4 rơbô MW. Mơya tus tŭ do, càr Dăk Lăk mìng rơ̆p dờp ring bal mờ gùng dà bơcri priă mờ dờp ring bal mờ cau bơcri priă lơh 19 rơndăp broă năng lượng lơh geh wơl, kờp jơh bơta pràn mờr 1 rơbô 128 MW; tàm hơ̆ geh 11 rơndăp broă lơh ồs đèng càl; bơta pràn mờr 590 MW. Bơat ờ ndrờm bal uă ngan đah bơta geh bal mờ khà rơndăp broă lơh geh lơh tàm gŏ ală “tiah gơkòl” pal pơn jăt tai bơsong. Tàm hơ̆, sră nggal bơcri priă, tơm ntrờm ù tiah, phan bơna tơrbŏ bal mờ bơta pràn lơh geh bơta pràn ồs đèng kung gam là ală bơta geh ală cau tờm bơcri priă sền gròi ngan. Bè broă do, Mò Nguyễn Thị Thu An, Kwang lam bồ Sờh Lơh sa măi mok mờ Kă bro phan càr Dăk Lăk pà git: “Jăt jơnau sồt bơh Anih duh broă Làng bol càr Dăk Lăk dê, tơngai bol añ gam lơh ngan tơrmù tơngai bơsong ală sră nggal bơcri priă gam bơh 50 tus 60% tơngai pơn drờm mờ lài. Broă dong kờl “gùng tơlir” rơ̆p bơsong mhar sră nggal bơcri priă, dan mờ kấp gùng dà bơcri priă gơwèt mờ ală rơndăp broă lơh gùng che ồs đèng lơh geh wơl”.

Jăt ồng Đào Mỹ, Phó Chủ tịch Anih duh broă Làng bol càr Dăk Lăk đơs, ală tiah geh bơta pràn rơ̆p geh ai lài hòi jà bơcri priă, hòi jà bơcri priă mờ jơnau kờñ ai bơta niam nàng ală rơndăp broă lơh gơtùi lơh mhar tŭ di pal tơl ală jơnau kờñ. “Ală tiah geh bơta ƀuơn, bol añ rơ̆p lơh mhar hòi jà, hòi jà bơcri priă nàng cau bơcri priă lơh. Lơh bè lơi tŭ cau bơcri priă tus sền, di lah tơl niam ală bơta bơcri priă den gơtùi lơh mơ tơn, ờ gơtùi lời gơtìp kal ke tai”.

Ồs đèng càl rơ̆p gơs dùl tàm ală bơta pràn kwơ màng nàng càr Dăk Lăk lơh pràn tam gơl tơlir, gơguh lơh sa mhar mờ bơtàu tơnguh kơl jăp.