Ală ngai do, tàm uă suơn sầu riêng tàm sàh Chư Prông, càr Gia Lai, làng bol pal ơpah cau koh kơl ală tờm chi neh chơt. Tàm thôn Hoàng Yên, uă suơn sầu riêng lài do gơs tơlir niam ngan, tŭ do mìng gam tờm ro, nha gơ jrùh jơh, mpờl mìng ntê lơm gời. Tơnơ̆ uă dơ̆ jòi broă nàng dong suơn chi mơya ờ geh cồng nha, ồng Trịnh Ngọc Oanh, ơm tàm thôn Hoàng Yên pal kơl jơh suơn chi neh sơngka sền gàr 4 nam. Hìu bơnhă ồng Oanh geh 162 tờm sầu riêng mut tàm nam dơ̆ 4 mờ rơcang ai dơ̆ pik tơnhàu sầu riêng. Mơya mìng tơnơ̆ 1 tŭ tơngai, tờm chi dồ ròt gơbàn kòp hơ̆ sồng chơt: “Suơn chi hìu añ dê neh 4 nam ờ hềt pik tơnhàu, nam do mờr tơt plai den chơt jơh. Pơlai soh ngan, hoàc tŭ tơngai hơ̆ sồng priă jền tai. Tŭ do pal kong, ờ git lơh bè lơi, pal kơl sang jơh”.

Ờ mìng hìu bơnhă ồng Oanh, uă hìu bơnhă làng bol ndai tàm thôn Hoàng Yên kung gơbàn ndrờm bè do sơl. Geh 2, 3 hìu bơnhă chơt 2, 3 jơt tờm, geh hìu bơnhă chơt git nđờ rhiang tờm tơn. Bơh dùl suơn sầu riêng gơs tơlir, suơn chi bi Lê Văn Thành ơm tàm Chư Prông tŭ do mìng gam ală tờm ro lơm. Nha gơ jrùh mờr jơh, ntê ro jơh, uă tờm neh chơt tơn. Hìu bơnhă bi Thành bal mờ ală oh mi tam mờr 300 tờm sầu riêng, tus tŭ do neh mờr 6 sơnam. Nam lài, suơn chi tơnhàu geh mờr 17 tấn plai, mờ giă tac 57 rbô đong dùl kĭ. Mơya mut tàm kàl pik tơnhàu nam do, tờm chi nisơna gơbàn kòp mờ chơt jơh. Bulah ờ hềt git nền bơta lơh gơbàn kòp, bi Thành pà git tàm tờm chi geh ală bă jù. Tơnơ̆ hơ̆, nha ro, gơ jrùh jơh hơ̆ sồng tờm chi chơt hời rơhời: “Nam lài kung chơt sơl mơya dồ êt gời, nam do chơt uă den tàng làng bol koh kơl nàng tam pa wơl. Làng bol moat jrùm, ờ gơ dan lòt tàm suơn tơn. Dà kơl hề nđờ nam do mờ tŭ do suơn chi chơt jơh, nùs tồr gơ chul ngan”.

Ồng Ngô Anh Tuấn, lơh broă mờng chài Cơldŭ Broă lơh sa suơn sre - Phan bơna bơt bơtàu sàh Chư Prông, càr Gia Lai yal, bơta sầu riêng chơt dồ ròt tŭ do tơrgùm uă ngan tàm thôn Hoàng Yên mờ ƀòn Bạt. Bă sầu riêng gơtìp chơt geh kờp sền kung rlau 10 lồ. Bơh sền swì bơh chờm, gah lơh broă geh gơnoar pà git, sầu riêng chơt digơlan gơ rềng tus bơsềt kòp. Ală tềl tơnggŏ tềng tờm chi ndrờm bè bơta tờm tiêu gơbàn kòp chơt mhar, chơt lơyài. Pal sền ngac là, uă ngan bă sầu riêng chơt gơ ơm tàm ală tiah ring, bơta pràn tuh tơlik dà ờ niam. Tŭ mìu jŏ jòng, dà gơ kờn tàm suơn, lơh gơlik bơta ƀuơn nàng bơsềt kòp in gơlik geh mờ bơtờp uă. Ồng Ngô Anh Tuấn pà git: “Uă ngan ală suơn gơtìp chơt là ală suơn geh ù tiah ring, dà ờ gơtùi tuh tơlik. Nàng pleh bơtờp uă, ƀòn lơgar hòi jà ală hìu bơnhă geh tờm chi chơt koh kơl chi, wàs jơh suơn; ală suơn ờ hềt gơtìp chơt den tờ rbòng tuh tơlik dà, ờ lời tờm chi gơbam dà”.

Tŭ do, gah lơh broă geh gơnoar sàh Chư Prông, càr Gia Lai pơn jat tai sền nền wơl bă sầu riêng gơtìp chơt, pơlam làng bol lơh niam ală suơn chi gơtìp gơ rềng mờ rơcang lài tuh tơlik dà. Bơta sầu riêng chơt dồ ròt tơnơ̆ tơngai mìu jŏ jòng ờ mìng lơh gơbàn hoàc huơr tơn tus cau tam in, mờ gam ai gŏ ală bơta aniai tŭ rề ơnàng tam bơta chi tam do tàm ală bă tiah ờ gơtùi.