Tàm pơrjum bơyai, jơnau bơh Mpồl lơh broă bal Lơh sa suơn sre Dà Mri pà gŏ loh làng ngan ală kal ke gam geh ai. Mpồl lơh broă bal tŭ do geh 180 nă cau, mờ mờr 450 lồ ù tam sầu riêng. Broă lơh sa dờng, mơya bơh ală hìu kung gam geh bơta krơi is bè broă tam. Geh cau sơnka sền gàr phan tam jăt broă lơh mờng chài, geh cau ngui jăt broă lơh geh bơta chài; broă ngui phơng sih, sơnơm sền gàr phan tam ha là cih ală jơnau tàm broă lơh kung ờ hềt geh tŭ ring bal. Ồng Nguyễn Thanh Sơn, Chủ tịch Mpồl duh broă atbồ broă lơh mờ kung là Lam bồ Mpồl lơh broă bal Lơh sa suơn sre Dà Mri pà git: “Bơta tŭ do bơh làng bol lơh broă sa suơn sre bol añ dê là lơh tơl nă dùl bơta krơi is, ờ geh cau lơi ndrờm mờ cau lơi. Broă geh ai tàm do là bơyai lơh sa bè lơi. Mpồl lơh broă bal bol añ neh geh gùng dà broă lơh, bơto lơh, pơrjum cri bơyai, broă lơh tơrlòng; jơnau kờñ dŭt ndơl là bơyai lơh jăt gùng dà broă lơh hữu cơ kơl jăp”.

Tus ngai 18 nhai 9 nam 2026, càr Lâm Đồng geh 1 rơbô 611 màh sồ tiah tam, tàm hơ̆ geh 1 rơbô 94 màh sồ drơng tàm broă tăc phan mờ lơgar bơdìh neh geh lơgar blơi phan kĭ; bal mờ 547 màh sồ hìu dăp klơm phan. Mơya, 173 màh sồ tiah tam, mờ bă ù rơlao 3 rơbô 600 lồ, mờ 61 màh sồ hìu dăp klơm phan neh gơtìp ờ ai lơh broă ha là toh wơl. Ală khà do pà gŏ, tŭ sră nggal ai màh sồ ngai sơlơ geh lơh ƀuơn, tam pà kấp mờ lơh jăt sồ jơh, bơta tờm atbồ pal tam gơl pràn tus mờ broă lơh geh sùm tơnơ̆ mờ ai màh sồ. Hơ̆ là sền gròi phan lơh broă tàm broă lơh sa suơn sre, gàr di broă lơh sa, cih tơl ală broă lơh, jòi geh tiah tam mờ tơnguh uă kơnòl bơh tơl nă cau dê tàm mpồl broă lơh. Ồng Lê Quốc Thanh, Kwang Lam bồ Anih bơto pơlam broă lơh sa suơn sre dà lơgar đơs nền: “Màh sồ tiah tam ờ hềt đơs tus bơta lơi, mìng rơ̆p là bơta geh mơ. Gam làng bol lơh broă sa suơn sre tam phan mờ gùng dà broă lơh lơi, ngui khà lơi, ngui broă lơh lơi, phan lơh broă bè lơi den jơh ală jơnau yal tơngit tàm màh sồ hơ̆ sồng đơs tus bơta niam phan geh lơh”.

Jơnau yal do pà gŏ, màh sồ tiah tam bañ mìng geh sền bè dùl “pang sră” nàng ai phan geh lơh bơh broă lơh sa suơn sre tăc tus tàm drà kă bro dunia dê. Đah ngkời bơh màh sồ pal là dùl tiah tam phan geh bơyai lơh broă di pal, geh gùng dà broă lơh ndrờm bal mờ geh bơta pràn sền gròi bơta niam bơh broă blơi phan lơh broă tus mờ broă tăc phan geh lơh. Bơh jơnau tàm càr Lâm Đồng dê, gùng dà broă lơh geh ai ờ mìng gơwèt mờ sầu riêng mờ gam gơwèt tus mờ uă bơta phan geh lơh bơh broă lơh sa suơn sre ndai tàm Tây Nguyên mờ gùt lơgar dê.