Tàm anih cribơyai, ală cau ala mat đơs, broă lơh màh sồ tiah tam mờ màh sồ anih dăp ơn klơm phan là bơta pal geh kuơmàng ngan nàng phan lơh gơs bơh suơn sre geh tac uă jat sră pơrgon hờ lơgar ndai. Bulah bè hơ̆, nàng lơh geh cồng nha, ală ƀòn lơgar, mpồl lơh broă bal, mpồl lơh sa kă bro mờ cau tam phan kờñ pal sền gròi tus broă gàr sùm ală bơta pal geh bè tam, sơngka sền gàr, gròi sền phan sa aniai, ngui sơnơm sền gàr phan tam di jơnau sồr mờ yal loh làng jơnau tơnggit broă lơh sa.

Mò Hồ Thị Bích Kiều, Lam bồ cơldŭ lơh sa sàh Ea Knuếc đơs ală bơta gơ kòl mùl màl kờñ pal geh bơsong mơ:

“Tŭ do, sàh gam kal ke tàm broă git nền bă tiah bơh tơl bă ù dê jat jơnau sồr, tài gơ rềng tus ală công ty, mpồl lơh sa kă bro kơphe. Tàm ù tŭ do ală công ty uă ngan là tam kơphe, mơya tŭ lơh màh sồ tiah tam is tơl bơta chi tam in den gơlik geh bơta gơ kòl tàm broă git nền mat sơnđan, nhàr tiah tam. Bơh ală bơta kal ke do, ƀòn lơgar kờñ geh dong kờl bè mờng chài lơh broă, pơlam lơh jat di mờ jơnau sồr”.

Ală cau ala mat kung tam pà mờng chài mùl màl tàm rơndap broă lơh sa mờ lơh bal tac phan lơh gơs pơgồp bal mờ màh sồ tiah tam. Ala mat mpồl lơh sa kă bro, mpồl lơh broă bal đơs là, màh sồ tiah tam mìng lơh geh cồng nha tŭ pơgồp bal mờ broă lơh jat sền is, cih jơnau yal pah ngai bè sơngka sền gàr mờ ngui phần mềm jòi git anih lơh gơlik. Broă lơh jat jơnau sồr lơh gơlik phan là bơta kuơmàng nàng sền gàr bơngă pin dờn màh sồ dê, tơrmù ƀà jơnau pơhìn gơtìp drà kă bro blơi phan lơgar ndai dê tơngkah lài halà ai wơl màh sồ tiah tam.

Ồng Lê Quốc Thanh, Kwang lam bồ Anih tờm dong kờl bơto pơlam broă lơh sa suơn sre dà lơgar đơs nền, lơh màh sồ tiah tam mìng rơp là bơta pal geh bơh chờm lơm; bơta kuơmàng rlau là rơndap broă lơh sa mờ gàr sùm mah sồ nàng phan lơh gơs bơh suơn sre geh tac sùm tàm ală drà kă bro:

“Bol he pal git loh gơnoar, bơta kuơ, kơnòl tơl nă cau dê tàm dùl bơta lơh bal. Là să tờm cau lơh gơlik phan pal git nền gơnoar, kơnòl he dê tŭ tus bal. Mpồl lơh sa kă bro kung bè hơ̆ sơl, is ồn là anih lơh broă dà lơgar, anih lơh broă mờng chài, mpồl dong kờl bơto pơlam broă lơh sa suơn sre. Bè hơ̆ den hơ̆ sồng gơtùi bơt bơtàu geh màh sồ tiah tam nàng geh mut tàm drà kă bro”.