Tàm dùl dơ̆ livestream tơrbŏ bal broă tăc phan geh lơh bơh suơn sre, lŏ Đặng Thị Hồng Đào, cau tờm hìu kă bro Ce Nghinh Phong, tàm sơnah ƀòn Phú Yên, càr Dăk Lăk, yal ală phan ce, mứt mờ dà plai màk geh hìu lơh. Neh geh jơnau mờng chài yal, ai phan geh lơh tàm ờ uă hìu tăc mờ anih lòt nhơl, mơya gơwèt mờ broă lơh sa gam ờ dờng, mìng kơnờm tàm bơta pràn bơh dùl nă să, lŏ Đào kung gam kờñ tai cau lơh broă bal bal mờ ală gah tăc phan pa. Livestream là dùl broă lơh nàng lŏ Đào ai phan geh lơh tus rềp rơlao mờ cau blơi, jòi geh bơta niam nàng rề ơnàng drà kă bro. “Livestream là añ kờñ tus bal, ai phan geh lơh tus mờ cau ngui, ai geh dơ̆ niam nàng tìp mờ cau blơi, rề ơnàng drà kă bro. Tŭ do hìu kă bro lơh mìng dùl nă să mờ ờ hềt geh cau lơh broă bal, den tàng ờ hềt tơnguh jơh bơta pràn, den tàng añ kờñ ngan tìp geh cau lơh broă bal nàng bơtàu tơnguh drà kă bro”.

Bơh dùl dơ̆ yal phan geh lơh tàm măi mok sồ tus mờ broă lơh gơs anih tăc phan kơl jăp kung gam dùl bơta ờ ndrờm bal. Mờ ală hìu lơh ờ dờng bè lŏ Đào dê, măi mok gơtùi pờ geh tai dơ̆ niam nàng tus mờ cau blơi, mơya nàng lơh bơta niam gơs sră tăc phan, geh sùm broă tăc mờ rề ơnàng broă tăc gam gơrềng tàm bơta niam phan geh lơh, bơta pràn ai phan mờ bơta pràn tơrbŏ bal mờ drà kă bro.

Tàm dùl broă lơh ndai bơh mpồl lơh sa dê, măi mok gam dong kờl ờ uă hìu làng bol lơh broă sa suơn sre rơcang lài rơlao tàm broă sơnka sền gàr phan tam. Hìu nhă mò Lê Thị Yến, tàm sàh Ea Drăng, càr Dăk Lăk neh tam gơl uă ù 5 lồ tam cao su neh kra nàng tam kơphe bơrlŭ bal mờ sầu riêng. Tàm bă ù do, hìu nhă mò neh bơcri priă nàng blơi phan tuh dà ntờc pơgồp bal mờ ồs đèng măt tơngai mờ kờp jơh priă tă lơh di pơgăp 1 tơmàm đong. Phan tuh dà gơtùi lơh bơh ngài mờ điện thoại, dong kờl broă tuh dà ƀuơn rơlao, tơrmù gơrềng tàm broă lơh geh lơh tơn tàm suơn. Mò Yến pà git, broă ngui măi mok neh dong kờl hìu nhă tềm pềr broă sơnka sền gàr, rơcang lài rơlao mờ geh cồng nha rơlao tàm lơh sa. “Tŭ do 5 lồ ù neh bơcri priă lơh ồs đèng măt tơngai bloh, tuh dà ntờc, crăp tàm điện thoại, tŭ ơm tàm tiah lơi kung gam gơtùi pờ nàng tuh dà sơl. Ngui bơta jăk chài măi mok pa den cồng nha uă rơlao, lài mờ tŭ tơnhào geh 5 tấn kơphe tàm 1 lồ, mơya tŭ do neh tus 6 tấn tàm 1 lồ mờ ờ hoan roh bơta pràn lơh broă”.

Bơh tàm broă tuh dà geh lơh mờ điện thoại tus mờ broă jòi geh cau blơi tàm măi mok internet, ală phan ngui do pà gŏ măi mok sồ gam rơhời geh tàm broă lơh sa, kă bro bơh làng bol lơh broă sa suơn sre càr Dăk Lăk dê. Mơya bơta geh tus bal ờ ndrờm. Ờ di hìu lơi kung tơl priă nàng blơi phan lơh broă is; kung ờ di cau lơi ai phan tơmŭt tàm internet ndrờm gơtùi geh sùm lơh broă tăc phan geh cồng nha. Den tàng, bơdìh mờ broă rơcang lài bơh tơl hìu, broă bơto sồr, tơrbŏ bal mờ dong kờl làng bol lơh broă sa suơn sre rơwah măi mok gơdờp bal mờ jơnau kờñ tàm mùl màl geh kwơ màng ngan.

Tàm sàh Ea Drăng, Mpồl Cau lơh broă sa sàh do gam rơhời ai măi mok sồ tàm broă atbồ, đơng lam. Mò Vũ Thị Thúy Hoà, Chủ tịch Mpồl Cau lơh broă sa sàh Ea Drăng pà git bè broă lơh bơh Mpồl dê. “He lơh jơh mờ măi mok điện tử sồ. Bơh tŭ tơmŭt bal mpồl lơh broă sră nggal tus tŭ do jơh ală jơnau tơngit ndrờm geh updata sùm mờ lơh sùm. Nàng lơh gơtùi broă do den lài mờ hơ̆ he neh bơsram nền nòn ngan, at tê sơn-io broă ai tơl nă oh mi lam bồ in. Bơta tờm kwơ màng ngan bơh sàh Ea Drăng dê là pal jòi geh làng bol gam kờñ bơta lơi nàng he dong kờl di mờ lơh di jơnau kờñ ală cau tàm mpồl làng bol lơh broă sa suơn sre dê gam kờñ bè sơntìl phan tam, phan ròng geh bơta niam, bơta kwơ mờ geh anih lơh gơs loh làng”.

Mờ broă mờng chài lơh tàm ƀòn lơgar, jơnau kờñ geh ai ờ mìng là ai ală phan măi mok sồ tàm broă lơh mpồl dê, mờ gam pal dong kờl cau tàm mpồl git ngui măi mok nàng bơsong ală jơnau kờñ mùl màl tàm lơh sa, kă bro. Tàm 6 nhai bồ nam do, ală kấp Mpồl Cau lơh broă sa càr Dăk Lăk neh dong kờl mờr 2 rơbô hìu ai phan geh lơh mŭt tàm drà kă bro điện tử, lam rơlao 116 rơbô nă cau tàm mpồl crăp, ngui anih yal tơngit Làng bol lơh broă sa suơn sre Việt Nam. Rơlao 300 ơdŭ bơsram bơta jăk chài geh bơyai lơh, hòi jà mờr 27 rơbô nă cau tàm mpồl, làng bol lơh broă sa suơn sre tus bal. Ồng Võ Duy Kha, Phó Chủ tịch Mpồl Cau lơh broă sa càr Dăk Lăk pà git, Mpồl ai jơnau kờñ dong kờl ală sàh, sơnah ƀòn yal phan geh lơh, bơto sồr jòi gŏ anih lơh mờ tơnguh broă pơgồp bal kă bro. “Bol añ neh lơh rơndăp broă wèt tus pah nam tơl sàh, sơnah ƀòn pal lơh geh ală clip nàng yal phan OCOP, phan geh lơh bơh suơn sre pơnrơ ngan ai làng bol lơh broă sa suơn sre dê, bơto sồr dong kờl phan geh bơh 3 sơrmañ rơlao hờ đang geh màh QR jòi anih lơh gơs, pơgồp bal mờ ală mpồl lơh broă tàm broă blơi lài phan geh lơh”.

Mùl màl pà gŏ, tam gơl sồ tàm lơh sa suơn sre ờ mìng là rơcang lài phan lơh broă pa ha là ai phan mŭt tàm măi mok internet. Bơta kwơ màng là làng bol lơh broă sa suơn sre geh rơwah măi mok gơdờp bal, git tàm broă ngui mờ geh sùm ngui tàm mùl màl lah ờ; mờ ală phan hơ̆ geh dong kờl làng bol tơrmù priă tă, tơnguh uă bơta niam phan geh lơh mờ tus mờ drà kă bro niam rơlao lah ờ. Tŭ broă ngui măi mok pơgồp bal mờ jơnau kờñ tàm mùl màl lơh sa, kă bro, dong kờl làng bol lơh broă sa suơn sre càr Dăk Lăk rơhời git ngui măi mok mờ tơnguh uă bơta kwơ phan geh lơh bơh suơn sre dê.