Dăk Lăk là dùl tàm ală tiah tam sầu riêng tờm ngan bơh gùt lơgar dê, mờ kờp jơh bă ù rlau 41 rơbô lồ, khà lơh geh nam 2026 pơgăp 500 rơbô tấn. Broă lơh dờng lơh tơl jơnau sồr tam phan geh lam lơh bơh ngai 26/10 tus ngai 26/11 tàm 35 sàh, sơnah ƀòn. Tơngume tơrgùm bơto pơlam cau lơh broă sa in lơh jat broă lơh tam phan VietGAP; ngui phơng sih, sơnơm sền gàr phan tam mờ jơnau sồr; atbồ dà, tơn hào, rào goh phan, gàr niam sàng goh phan ngui sa mờ jòi gĭt tiah tờm lơh gơlik.

Bal mờ hơ̆ là bơto pơlam ală jơnau sồr bè màh sồ tiah tam, atbồ bơta niam bơkah mờ tơnguh uă cồng nha lơh gơlik sầu riêng. Broă lơh dờng rơ̆p dong cau lơh broă sa in tơnguh uă bơta gĭt wă, hời rơ hời tam gơl mờng kwèng tam phan, lơh jat broă tam phan jat tơl jơnau sồr VietGAP dê mờ rcang atbồ ală jơnau yal tiah tam. Bơh hơ̆, lơh geh bơnàng jă tơnguh uă bơta niam bơkah, gàr kơ̆ bơngă pin dờn sầu riêng Dăk Lăk, tơnguh bơta pràn tàm pơrlòng mờ sơlơ tơnguh tai gah phan bơtàu tơnguh kơnhăp kơ̆.