Tơnau bơtơt rbòng dà Ia Mơr geh kờp jơh priă bơcri lơh mờr 3 rbô tơmàn đong, geh bơta pràn dơng mờr 180 tơlak khối dà, geh bơceh lơh nàng ai pà dà ƀồm mờr 12 rbô 500 lồ ù tam phan mờ ai dà ngui sa mờr 50 rbô nă cau tàm 2 càr Gia Lai mờ Dăk Lăk in. Sàh tiah nhàr lơgar Ia Rvê, càr Dăk Lăk neh sền wơl mờr 1 rbô 100 lồ ù tàm ală thôn 6, 7, 8, 9 mờ 11 nàng sồr rề ơnàng tiah ƀồm dà tơngai dơ̆ 2 bơh rơndap broă lơh Bơtơt rbòng dà tơnau dơng dà Ia Mơr dê.

Bơh lòt sền mùl màl, ồng Lương Nguyễn Minh Triết đơs sùm, bơcri priă lơh phan bơna bơtơt rbòng dà tàm tiah nhàr lơgar geh kuơ dờng màng ngan tàm bơtàu tơnguh lơh sa, tơrmù rƀah kơ̆ kơljap jŏ jòng sùm, gàr kơ̆ làng bol ơm kis mờ gàr kơ̆ lơngap lơngai dà lơgar. Den tàng, ală sờh, gah broă lơh geh gơ rềng kờñ pal pơgồp bal mờ anih lơh broă dà lơgar bơt bơtàu broă rơndap lơh bơcri priă lơh rbòng dà ai 1 rbô 100 lồ ù neh sền nền wơl in, gàr loh làng, song dơpă, ờ gơ tàm rơndap rơndồl mờ ală rơndap broă lơh ndai. Bè jŏ jòng, rơndap ù tiah rbòng dà pal kờp dŭ tus jơnau kờñ bơh jơh bal 12 thôn tàm sàh dê.