Ồng Bùi Đức Quỳnh, 48 sơnam, tàm thôn Đăk Tăng, sàh Rờ Kơi, càr Quảng Ngãi geh bă ù suơn ơnàng mờr 20 lồ, geh tam bal kơphe mờ sầu riêng; tàm hơ̆, tờm sầu riêng geh di pơgăp 15 lồ. Nam do, kờp jơh khà plai sầu riêng tàm suơn ồng dê geh mờr 80 tấn, priă geh bơh tăc plai sầu riêng di pơgăp 4 tơmàn đong. Ồng Bùi Đức Quỳnh pà git, tam tờm sầu riêng pal sơnka sền gàr sùm mờ ai uă ngan tơngai tàm tŭ tờm sơn đờm geh plai: “Sầu riêng geh màh sồ tiah tam den cau tus blơi, mpồl lơh sa kă bro kung iang nùs rơlao, tài git tiah tờm phan geh lơh mờ gơtùi jòi. Tŭ sầu riêng geh màh sồ, priă tăc kung gơguh rơlao bơh 1 tus 2 priă pơn drờm mờ ală suơn ờ hềt geh màh sồ”.

Bơh ờ uă hìu làng bol tam, tus tŭ do bă ù tam sầu riêng tàm sàh Rờ Kơi, càr Quảng Ngãi neh rơhời rề ơnàng mờ di pơgăp 355 lồ. Bal mờ broă rề ơnàng bă ù tam, sàh gam pơgồp bal mờ mpồl lơh sa kă bro, lơh màh sồ tiah tam mờ jòi geh drà tăc kơl jăp. Do geh sền là bơta tờm kwơ màng nàng tờm sầu riêng bơtàu tơnguh kơl jăp. Ồng Nguyễn Minh Thuận, Chủ tịch Anih duh broă Làng bol sàh Rờ Kơi, càr Quảng Ngãi pà git, tềng đăp măt, sàh lơh broă bal mờ mpồl lơh sa kă bro nàng dong kờl kơl jăp drà tăc kơphe mờ sầu riêng ai làng bol in: “Nàng rơcang tàm broă tăc ai phan geh lơh bơh làng bol lơh broă sa suơn sre dê, sàh gam pơgồp bal mờ ală mpồl lơh sa kă bro nàng blơi ing, kơl jăp broă blơi ală phan geh lơh bè kơphe mờ sầu riêng. Mơya, nàng gàr kơl jăp mờ jŏ jòng, kung kơ̆p kờñ ală sờh, gah lơh broă mờ Anih duh broă Làng bol càr Quảng Ngãi geh gùng dà broă lơh dờng, hòi jà bơcri priă bơh ală hìu măi tus blơi, lơh phan geh lơh bơh broă lơh sa suơn sre, tàm hơ̆ uă ngan là ală bơta plai chi tàm sàh đah măt tơngai mŭt do, nàng làng bol kơl jăp broă tăc tŭ tơnhào phan geh lơh”.

Sầu riêng gam gơs dùl tàm ală phan tam geh uă priă tàm tiah đah măt tơngai Mŭt càr Quảng Ngãi dê. Càr Quảng Ngãi tŭ do geh di pơgăp 4 rơbô 150 lồ ù tam tờm sầu riêng, tàm hơ̆ geh rơlao 1 rơbô lồ neh geh plai. Tus tŭ do, gùt càr geh 23 màh sồ tiah tam sầu riêng tăc mờ lơgar bơdìh, kờp jơh bă ù mờr 392 lồ. Màh sồ tiah tam geh dong kờl sền gròi broă lơh, phan lơh broă, phan lơh aniai, jơnkah sơnơm sền gàr phan tam mờ jòi gŏ tiah tam phan, di pal mờ jơnau kờñ bơh drà blơi phan tàm lơgar bơdìh dê. Ồng Nguyễn Hoài Tâm, Kwang Lam bồ đah tam phan, sền gàr phan tam bal mờ Atbồ bơta niam càr Quảng Ngãi pà git, jơnau kờñ ờ di tơnguh bă ù tam mờ ală bơta, mờ phan geh lơh gơs pal geh drà tăc. “Bă ù tam sầu riêng tŭ do mìng tơrgùm tàm ală sàh đah măt tơngai Mŭt bè: Mô Rai, Rờ Kơi, Ia Tơi, Bờ Y, ală sàh do ndrờm là ală sàh tiah nhàr lơgar. Bơta do pà gŏ trồ tiah, ù tiah tàm do gơdờp mờ tờm sầu riêng. Mơya, do là phan tam geh broă bơcri priă uă, den tàng bơta jăk chài tam sơnka sền gàr mờ dà pal ring bal, den tàng làng bol pal git nền bơta chài hơ̆ sồng gơtùi bơtàu tơnguh kơl jăp”.