Bơh bồ nam tus tŭ do, tàm càr Dăk Lăk neh gĭt gŏ 3 tiah bơtờp kòp jê ndul gơjroh sur câu Phi tàm kơnhoàl Cư M’gar mờ ƀòn dờng Buôn Ma Thuột, lơh 56 nơm sur bơtờp kòp chơ̆t mờ pal tơ̆p pơrgŭc. Bal mờ hơ̆, 7 tiah kòp sơnrang tàm phan ròng neh gơtìp tàm 4 kơnhoàl mờ ƀòn dờng Buôn Ma Thuột. Anih tờm Gròi sền Kòp tê jê să càr Dăk Lăk kung yal 2 nă cau chơ̆t tài pin bơtờp kòp sơnrang. Tềng đăp bơta kòp bơtờp, Anih duh broă Làng bol càr Dăk Lăk sồr ală ƀòn lơgar, sờh, gah geh gơrềng mhar lam lơh jăt ală broă lơh rơcăng, kơryan kòp bơtờp tàm phan puan jơng, phan bàr nơm jơng.

Broă tờm là bơsong jơh ală tiah geh kòp, bañ lời kòp bơtờp mờ gơlik geh tai tiah geh kòp pa; di tŭ tơ̆p pơrgŭc phan ròng bơtờp kòp, dong kờl cau ròng phan gơtìp hoàc hươr; lơh glài kràñ ală cau tăc blơi, jun pơndiang phan ròng tìs mờ kơrnoăt boh lam; mơkung lơh pràn broă lơh cĭt rơcăng vaccine ai mpồl phan ròng in, pơnđơl lơh geh khà êt ngan là bơh 80% kờp jơh mpồl phan ròng.