Anih tờm Dong kờl bơto pơlam broă lơh sa suơn sre dà lơgar pà gĭt, Jơnau lơh nền tàm pơrjum sồ 36 bơh Chính phủ dê ai lơh jat ngai 31/7, neh lơh niam sră pơ àr pà màh sồ tiah tam, màh sồ anih dăp ơn klơm phan. Broă pà mờ atbồ màh sồ  geh lơh jat tàm internet, jat jơnau pal jat mpồl cau, cau dồ nă să yal is, kong kơnòl is, pơgồp mờ lòt sền tơnơ̆ mờ jòi gĭt tiah tờm lơh gơlik. Tơnơ̆ mờr 2 nhai lam lơh, gùt lơgar neh pà pa 787 màh sồ tiah tam.

Tàm Gia Lai, mò Nguyễn Thị Tố Chân, Phó Kwang lam bồ Sờh Broă lơh sa suơn sre mờ Tiah ơm kis pà gĭt, gùt càr pà geh 43 màh sồ tiah tam, tơnguh kờp jơh màh sồ tiah tam gùt càr gơguh tus 424 màh sồ. “Broă jòi tơrgùm ală jơnau yal pà he in gŏ bơta sền ală bơta là jơnau kờñ bơh làng bol dê là geh. Mơya, bơta gĭt wă bơh làng bol dê ờ hềt ring bal, den tàng pal pơn jat mblàng yal, hòi jà, bơto pơlam nàng cau in wă là broă dờp dùl màh sồ tiah tam là dờp dùl ù tiah nàng sền gĭt bơta kwơ phan bơna bơh he dê. Tŭ gĭt wă làng bol neh geh tơnguh uă den rơ̆p lơh sir geh broă jòi gĭt tiah tờm lơh gơlik. Bơh hơ̆, ală mpồl lơh broă bal, mpồl lơh sa kă bro bơt bơtàu lơh bal ală anih lơh broă jat tàm ală jơnau yal bơh làng bol dê”.

Bulah sră pơ àr pà màh sồ tiah tam neh ƀuơn ngan rlau, ala mat mpồl lơh sa kă bro mờ mpồl lơh broă bal đơs là gàr niam màh sồ bơh tơl kàl pa là broă pal sền gròi ngan. Nàng lơh geh bơta hơ̆, cau lơh broă sa pal cih jơnau cih tam pha, gròi sền phan bơna bơh sơn rờp, sền gĭt sră nggal; anih dăp ơn klơm pal gàr niam ală bơta neh dan cih mat. Do là ală jơnau yal kờñ pal geh nàng jòi gĭt tiah tờm lơh gơlik mờ gròi sền bơta bơkah niam phan lơh geh bơh broă lơh sa suơn sre dê. Ală mpồl lơh broă kung dan bơt bơtàu broă lơh nàng mpồl dong kờl bơto pơlam broă lơh sa suơn sre mpồl bơtiàn tus bal pà yal drơng broă măi mok, dong kờl cau lơh broă sa lơh jat mờ gàr niam ală jơnau sồr bơh màh sồ dê.

Ồng Lê Quốc Thanh, Kwang lam bồ Anih tờm Dong kờl bơto pơlam broă lơh sa suơn sre dà lơgar pà gĭt, tơngai tus ală anih lơh broă dong kờl bơto pơlam broă lơh sa suơn sre mpồl bơtiàn rơ̆p sơlơ tơnguh bơto pơlam làng bol lam lơh broă sa, bơto bơtê mpồl cau kấp hơđơm, tàm tơrbŏ bal mpồl lơh sa kă bro mờ mpồl lơh broă bal mờ cau lơh broă sa; mơkung tơrgùm wơl ală bơta kòl yan gơlik geh nàng geh jơnau dan tă bơsong. “Mpồl Dong kờl bơto pơlam lơh broă sa suơn sre pal lòt bal mờ làng bol, bal mờ làng bol tơn. Gơtùi tam gơl broă lơh, digơlan là tàm suơn sầu riêng, suơn kơphê, suơn plai màk tơn, tŭ làng bol gam lơh broă, den mpồl tus dong kờl làng bol lơh tơn ală broă lơh yal tàm điện tử mờ ală broă mờ làng bol gam gơ tìp”.