Pơrjum bơyai geh bơta tus bal bơh ala mat ală anih lơh broă atbồ Dà lơgar, ală tiah, ală anih lơh broă dong kờl bơto pơlam broă lơh sa suơn sre, bal mờ ală mpồl lơh broă bal, mpồl lơh sa kă bro, anih lơh gơlik phan, anih dăp ơn klơm phan mờ tăc phan lơh geh bơh broă lơh sa suơn sre mờ lơgar ndai. Ală cau ala mat tơrgùm cribơyai ală jơnau sồr pa tàm atbồ, gàr niam màh sồ tiah tam, màh sồ anih dăp ơn klơm; mơkung mblàng ală kal ke tàm bơyai lơh broă sa, gròi sền phan bơna broă lơh sa suơn sre, gàr niam jòi gĭt tiah tờm lơh gơlik mờ lơh bal đah ală tiah tam phan mờ anih dăp ơn klơm, mpồl lơh broă sa kă bro tăc phan mờ lơgar ndai.

Bơh bơta geh ngan lơh sa, ồng Nguyễn Thanh Sơn, Kwang ătbồ Mpồl lơh broă bal Lơh broă sa sươn sre Dà Mri pà gĭt, Mpồl lơh broă bal geh 180 nă cau tàm mpồl, mờ mờr 450 lồ sầu riêng. Bơta kal ke dờng ngan tŭ do là broă lơh sa tam phan đah ală hìu bơnhă ờ hềt ndrờm bal, tàm tŭ drà kă bro ngai sơlơ sền gròi ờ mìng tus mờ phan bơna dŭt ndơl lơm mờ jơh bal mờ tơl jơnau sồr, broă lơh lơh gơlik mờ bơta pràn jòi gĭt tiah tờm lơh gơlik bơh tiah tam phan dê.

"Bơta geh ngan bơh làng bol lơh broă sa he dê là lơh sa tơl nă cau dùl bơta, ờ cau lơi ndrờm bal mờ cau lơi.  Broă ai tơlik tàm do là bơyai lơh sa bè lơi. Mpồl lơh broă bal bol añ neh geh broă lơh, pơlam tàp, pơrjum cribơyai, broă lơh lơh tơrlòng lài; jơnau kờñ dŭt ndơl là lam lơh sa jăt gùng dà hữu kơ kơ̆ kơl jăp".

Bơta geh ngan bơh Mpồl lơh broă bal Dà Mri dê kung đơs tus jơnau kờñ ngai sơlơ uă tàm broă gàr niam màh sồ tàm gùt càr Lâm Đồng. Tus tŭ do, Lâm Đồng geh 1 rơbô 611 màh sồ tiah tam, tàm hơ̆ 1 rơbô 094 màh drơng tăc mờ lơgar ndai neh geh lơgar blơi phan dờp; bal mờ 547 màh sồ anih dăp ơn klơm. Pal sền gròi ngan là, geh tus 173 màh sồ tiah tam mờ rlau 3 rơbô 600 lồ mờ 61 màh sồ anih dăp ơn klơm neh gơtìp ơm ing halà ai wơl.

 Ală khà do pà gŏ, tŭ sră pơ àr pà màh ngai sơlơ geh lơh ƀuơn rlau, tam pà kâp mờ lơh sồ, tờm ngan atbồ pal tam gơl pràn tus broă lơh gàr niam ală bơta tơnơ̆ tŭ pà, sơlơ tơnguh jat sền mờ tơnguh kơnòl bơh tơl mpồl lơh broă tàm ală broă lơh dê.

Ồng Lê Quốc Thanh, Kwang lam bồ Anih tờm Dong kờl bơto pơlam broă lơh sa sươn sre dà lơgar đơs nền, màh sồ tiah tam pa mìng là bơta bơh sơn rờp lơm; bơta kuơ ngan ngồn gơ ơm tàm broă tam phan, tơl jơnau sồr, ngui phan bơna mờ jơh ală jơnau yal tơngĭt gơ jat bal tàm tŭ lơh broă sa.

"Màh sồ tiah tam ờ hềt đơs tus bơta lơi ờ, gơ mìng là bơta pal geh lơm. Ai cau lơh broă sa tam mờ broă lơh lơi, ngui tơl jơnau sồr lơi, ngui broă lơh lơi, phan bơna bè lơi den jơh ală jơnau yal bơh màh sồ hơ̆ dê hơ̆ sồng đơs bơta niam bơkah bơh phan bơna dê".

 Bơh ală broă geh ai tơlik, pơrjum bơyai sồr đơs tơnguh lơh bal đah cau lơh broă sa, mpồl lơh broă bal, anih dăp ơn klơm mờ mpồl lơh sa kă bro tăc phan mờ lơgar ndai; lơh pràn ngui măi mok sồ tàm atbồ jơnau yal tơngĭt, jòi gĭt tiah tờm lơh gơlik, yal lài bơta gơ aniai; mơkung tơnguh uă bơta bơkah niam tiah tam phan dê nàng lơh geh jơnau sồr ngai sơlơ uă bơh ală drà blơi phan mờ lơgar ndai dê.