Nam 2024, tăc kơphê mờ lơgar ndai bơh lơgar Việt Nam dê lơh geh 1 tơlak 320 rơbô tấn, priă lơh geh bơh broă tăc kơphê mờ lơgar ndai mờr 5 tơmàn 500 tơlak dolar Mỹ. Bulah geh bơta ƀuơn, bơta pràn dờng, gah kơphê Việt Nam kong mờ uă bơta lòng tàm broă lơh bơtàu tơnguh kơ̆ kơl jăp jŏ jòng, is ồn là tàm broă atbồ sồ siă mờ ngui phan bơna broă lơh sa suơn sre.

Nàng sơlơ tơnguh tai gah phan kơphê bơtàu tơnguh kơ̆ kơl jăp jŏ jòng, nhai 6 nam 2024, rơndăp broă lơh “Bơt bơtàu tìp mat cribơyai broă lơh, tơnguh uă bơta pràn jak mờ gĭt wă bè ngui phan bơna broă lơh sa suơn sre geh kơnòl, khòm tơrgùm mờ bơsong sồ siă tàm broă lơh tam kơphê tàm lơgar Việt Nam dê” neh ngan ngồn sơnđờm mut lơh. Mờ jơnau kờñ tơn rềp priă lơh geh ai ết ngan rlau jơh 150 rơbô hìu bơnhă cau lơh broă sa tam kơphê tàm lơgar Việt Nam tàm nam 2030, ală cau ala mat neh cribơyai bè ală jơnau bơsram mờng chài rơ̆ ru bơh rơndăp broă lơh dê; tam pà bal ală broă lơh, broă bơsong tam kơphê geh cồng nha, kơ̆ kơl jăp jŏ jòng, ală broă lơh ngui phan bơna broă lơh sa suơn sre pa ngan, khòm tơrgùm mờ bơsong sồ siă ... Mơkung đơs gùng dà broă lơh mờ lơh geh bơta tàm tơrbŏ bal ală gah geh gơrềng tàm bơtàu tơnguh kơphê kơ̆ kơl jăp jŏ jòng tàm lơgar Việt Nam dê.