Lam lơh broă lơh jơnau kờñ dà lơgar bơtàu tơnguh lơh sa - mpồl bơtiàn tiah làng bol jơi bơtiàn dồ êt nă cau mờ tiah kơh bơnơm, ală nam do, sàh Ba Vinh, càr Quảng Ngãi neh ai lài priă jền bơcri bơt bơtàu phan bơna, lơh gùng lòt ƀòn lơgar, hìu niam chài, ală broă lơh drơng pơrjum, tơrgùm mat mpồl bơtiàn mờ sền gàr pràn kơldang làng bol. Bal mờ priă jền bơcri Dà lơgar dê, ală broă lơh ai càn priă geh dong kờl priă jền là bơta gơn kơnờm, là bơta kơldìng dong uă hìu bơnhă khin cha bơtàu tơnguh lơh sa. Pơn rơ bè hìu bơnhă ồng Phạm Văn Rôm. Bơh priă càn dong kờl priă cồng, ồng Phạm Văn Rôm neh khin cha bơcri priă tam 4 lồ tờm keo, ròng sur, iar, kơnờm bơh hơ̆, broă lơh sa hìu bơnhă dê rơhời kơnhăp kơ̆: “Geh bơta dong kờl Dà lơgar, Anih priă jền dong kờl cau rƀah dê ai geh bơta niam dong làng bol càn priă lơh sa den đơs bal làng bol geh tai bơta ƀuơn nàng bơtàu tơnguh lơh sa hìu bơnhă, rơhời tơn jơh bơta rƀah”. 

Tơngai bơh nam 2026 tus nam 2035, sàh Ba Vinh git nền broă ngui bơta pràn tàm dơlam is, prap gàr mờ bơtàu tơnguh ală broă bơh yau là gùng lòt kuơmàng nàng kờñ ai geh broă lơh jŏ jòng làng bol in. Mò Trần Thị Thanh Thúy, Phó Chủ tịch Anih duh broă Làng bol sàh Ba Vinh pà git: “Broă lơh jơnau kờñ dà lơgar gơ rềng tus priă bơcri lơh broă den lài ngan ƀòn lơgar tơrgùm pơgồp bal nàng dong kờl mờ lơh niam ală broă lơh tơrlòng lài bơh lài tus tŭ do mờ làng bol neh lơh. Pơn yơu bè ơdŭ bơto tàñ ồi kòn cau, do là ală broă lơh neh geh dong kờl den rơp pơn jat tai geh lam lơh uă mờ lơh gơs ală mpồl lơh gơlik phan bơna làng bol in. Mơya priă bơcri do geh jàu ờ uă den tàng ƀòn lơgar kơp kờñ rơp pơgồp bal jơh ală broă lơh jơnau kờñ nàng bơcri lơh gơlik phan bơna tờm làng bol in”.

5 nam do, bơh priă bơcri ală broă lơh jơnau kờñ Dà lơgar, càr Quảng Ngãi neh lam lơh 26 rơndap broă lơh dong kờl bơtàu tơnguh lơh sa jat ală mpồl lơh gơlik phan mờ 399 rơndap broă lơh bơtàu tơnguh mpồl bơtiàn, dong làng bol rơhời rơcang lài lơh sa, tơrmù bơta gơ wèt tàm dong kờl. Is ồn tàm nam 2026, Quảng Ngãi tam pà rlau 1 rbô tơmàn đong bơh priă bơcri Broă lơh jơnau kờñ dà lơgar bơtàu tơnguh lơh sa - mpồl bơtiàn tiah làng bol jơi bơtiàn dồ êt nă cau mờ tiah kơh bơnơm nam 2025 tàm pơrdờn wơl. Ală ƀòn lơgar gam sac rơ wah ală broă lơh tơrlòng lài dipal nàng ngui niam bơta ƀuơn tơl tiah dê. Hơ̆ là rề ơnàng tiah tam prìt sơ kòl pơgồp bal mờ lơh gơlik phan tàm sàh Ba Vì, rề ơnàng ală broă lơh tơrlòng lài tam tờm pơnàng, ròng phan tàm Ba Xa mờ rề ơnàng tiah tam chi lơh sơnơm tàm Măng Ri.

Ồng Xiêng Thanh Phúc, Kwang lam bồ Sờh Jơi bơtiàn mờ Pin dờn jat yàng càr Quảng Ngãi pà git: “Broă lơh jơnau kờñ dà lơgar tơngai bơh nam 2026 tus nam 2030, broă lam lơh jăt ală broă lơh jơnau kờñ dà lơgar bơtàu tơnguh tiah làng bol jơi bơtiàn dồ êt nă cau rơp lam lơh di rlau mờ bơta geh ngan. Rơp lam lơh ală broă lơh tơrlòng lài, krơh pơn rơ jak cau jơi bơtiàn dồ êt nă cau tàm ù tiah càr dê geh cồng nha rlau, di mờ bơta geh ngan rlau, geh cồng nha rlau mờ geh phan lơh gơs mùl màl, pơgồp bal mờ broă dong làng bol lik klàs rƀah mờ lik klàs rƀah kơnhăp kơ̆”.

Mờ bơta sền gròi Đảng, Dà lơgar dê bal mờ bơta lơh ngan brồ guh làng bol dê, ală broă lơh jơnau kờñ dà lơgar rơp pơn jat tai lơh geh cồng nha, lơh gơlik bơta gơn kơnờm pràn kơldang ai bơtàu tơnguh lơh sa - mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tàm ù tiah càr Quảng Ngãi dê in tàm tŭ tơngai pa.