Là mpồl lơh sa kă bro tac hờ lơgar ndai phan lơh gơs bơh suơn sre dờng tàm càr Dăk Lăk, mờ bàr bơta phan tờm ngan là kơphe mờ tiêu, Công ty Kong kơnòl nă să is Tổng Công ty Simexco ngai 02 nhai 9 Dăk Lăk geh jơnau kờñ priă bơcri uă ngan nàng blơi phan drơng broă lơh gơlik phan, tac phan hờ lơgar ndai in. Ồng Nguyễn Tiến Dũng, Phó Kwang lam bồ dờng công ty pà git, mpồl lơh sa kă bro tŭ do geh priă càn lơyah tơngai rlau 11 rbô tơmàn đong tàm 18 anih priă jền. Tàm tŭ tơngai priă tă blơi phan gơguh jơnhua, broă ală anih priă jền tơrmù priă cồng ai càn rơp dong mpồl lơh sa kă bro tơrmù uă ngan priă tă, lơh gơlik tai priă jền bơcri lơh mờ tơnguh bơta pràn tàm pơrlòng:

“Vietcombank là anih priă jền lam lài lam lơh broă tơrmù priă cồng ai càn jat jơnau sồr lơh bơh Chính phu dê. Mờ khà ai càn 1 rbô 500 tơmàn đong, khà priă cồng tŭ do bơh 1 tus 1,5%, dong mpồl lơh sa kă bro bol hi tềm pềr bơh 1 tus 1 tơmàn 500 tơlak đong pah nhai. Bơh hơ̆ dong tơrmù priă cồng ai càn, geh tai priă bơcri lơh nàng bơtàu tơnguh lơh sa kă bro”.

Ờ mìng mpồl lơh sa kă bro tac hờ lơgar ndai phan lơh gơs bơh suơn sre dờng, ală mpồl lơh sa kă bro dimơ mờ dềt tàm càr Dăk Lăk kung gam geh dờp kuơ bơh broă lơh tơrmù priă cồng ai càn Chính phủ dê. Ồng Đặng Anh Dũng, Kwang lam bồ dùl mpồl lơh sa kă bro linh kiện, phan crăp mòn oto tàm sơnah ƀòn Buôn Ma Thuột pà git, mpồl lơh sa kă bro tŭ do geh priă càn lơyah tơngai rlau 50 tơmàn đong tàm 3 anih priă jền. Tàm hơ̆, bơnah priă càn 15 tơmàn đong tàm Agribank Dăk Lăk neh mhar ngan geh tơrmù priă cồng, bơh sơn rờp dong mpồl lơh sa kă bro tơrmù bơta kơn jơ̆ bè priă bơcri:

“Añ gam càn priă tàm Agribank Dăk Lăk. Pa do, Anih priă jền neh lơh gơlik bơta niam, ai tơlik ală khà priă cồng ai càn lời ai mpồl lơh sa kă bro in. Mùl màl, anih priă jền dong kờl tơrmù priă cồng tus 1,5% jat jơnau lơh nền Chính phủ dê. Tơngai tus, añ kơp kờñ ală anih priă jền ndai kung dồ ròt lam lơh broă lơh do, dong mpồl lơh sa kă bro tơrmù priă bơcri, geh tai bơta gơn kơnờm nàng bơtàu tơnguh kơnhăp kơ̆”.

Tàm càr Dăk Lăk, Agribank là dùl tàm ală anih priă jền gờñ lam lơh tơrmù priă cồng ai càn jat jơnau sồr lơh Chính phủ mờ Anih priă jền dà lơgar dê. Ồng Võ Tiến Nam, Phó Kwang lam bồ Agribank Dăk Lăk pà git, tơnơ̆ tŭ geh jơnau sồr lơh, Anih priă jền neh sền wơl ală bơnah priă càn, git nền cau càn geh tơl bơta nàng tơrmù priă cồng. Dơ̆ tơrmù priă cồng ai càn sơn rờp geh lam lơh bơh ngai 25/10 pa do:

“Gơ wèt mờ ală bơnah ai càn lơyah tơngai tŭ do geh priă cồng rlau 10% dùl nam mờ ală bơnah ai càn dimơ tơngai geh priă cồng rlau 11% dùl nam, jơh ală sơnĕ anih priă jền neh lam lơh tơrmù priă cồng rlau 28 rbô bơnah priă ai càn, mờ kờp jơh khà priă ai càn rlau 9 rbô 800 tơmàn đong, kờp jơh khà priă cồng geh tơrmù cau càn in là mờr 20 tơmàn đong. Gơ wèt mờ ală bơnah priă càn pa gơ wèt gah lơh sa, kă bro mờ gah ai lài, sơnĕ anih priă jền lam lơh tơrmù priă cồng bơh 1,5 tus 2% dùl nam”.

Mờ mờr 18 rbô 750 mpồl lơh sa kă bro mờ rlau 82 rbô hìu bơnhă kă bro gam lơh broă, mpồl bơtiàn mpồl lơh sa kă bro geh gơnoar broă kuơmàng ngan gơ wèt mờ bơtàu tơnguh lơh sa mờ rề dia càr Dăk Lăk dê. Jat ồng Nguyễn Quang Vinh, Chủ tịch Mpồl cau kă bro càr Dăk Lăk, broă Chính phủ sồr tơrmù priă cồng ai càn tàm tơngai tŭ do geh gơtha mùl màl ngan, dong mpồl lơh sa kă bro tơrmù ƀà bơta kơn jơ̆ priă jền, ngan là tàm tŭ tơngai priă tă bơh chờm gơguh mờ drà kă bro gam uă tam gơl. Ồng Vinh dan, ală anih priă jền lam lơh ndrờm bal, nàng broă lơh do lơh geh cồng nha jrô ơnàng rlau:

“Chính phủ tŭ do geh jơnau pơlam gùng niam ngan tàm broă dong kờl ală mpồl lơh sa kă bro gam gơtìp kal ke, ngan là mpồl lơh sa kă bro tac phan hờ lơgar ndai, mpồl lơh sa kă bro tàm gah broă lơh sa suơn sre mờ mpồl lơh sa kă bro dềt mờ dimơ. Jat jơnau pơlam gùng hơ̆, añ kơp kờñ ală anih priă jền gờñ geh bơta ring bal, lam lơh ndrờm bal nàng ngui priă cồng ndrờm bal, tơrmù lơyah rlau tai, dong kờl mpồl lơh sa kă bro tơrmù ƀà bơta kơn jơ̆ bè priă càn”.

Dăk Lăk tŭ do geh 46 sơnĕ anih priă jền tàm lơgar mờ ală lơgar lơh broă, mờ kờp jơh priă dồs ai càn mờr 300 rbô tơmàn đong. Do là bơnah priă jền kuơmàng ngan nàng ală anih priă jền lòt bal, dong kờl mpồl bơtiàn ală mpồl lơh sa kă bro mờ hìu bơnhă kă bro bơtàu tơnguh. Broă rơcang lài tơrmù priă cồng ai càn ờ mìng dong cau càn tơrmù priă tă bơh chờm, tơrmù bơta kơn jơ̆ priă jền mờ gam lơh gơlik tai priă jền nàng bơcri wơl, pờ ơnàng broă lơh sa, kă bro.