Jơnau đơs pơn dŭt sồ 430, ngai 05 nhai 11 bơh Mpồl lơh kơnòl broă sùm Tỉnh ủy càr Dăk Lăk dê neh ring bal gùng dà dong kờl mờ kờp jơh khà priă kờp dŭ mờr 15 tơmàn 500 tơlăk đong, tàm tơngu me jơnau dan bơh Mpồl lơh kơnòl broă sùm Anih duh broă Mặt trận Dà lơgar Việt Nam càr dê.

Khà priă dong kờl ai tơl bơta niam nàng ală ƀòn ơm kis bơyai lơh dơ̆ sào bal, dong kờl kwang bàng bal mờ làng bol tìp bal, tơnguh nùs nhơm niam ƀòn lơgar. Anih duh broă Làng bol càr Dăk Lăk geh kơnòl sền wơl, pơn drờm khà priă, jal mhar lơh gơs sră nggal, gàr niam broă jào priă dong kờl tus tàm ală thôn, ƀòn, jơnum làng bol tiah drà lài mờ ngai 10 nhai 11.

Mờ tơngu me “Càr Dăk Lăk - Tiah tơrgùm ală rùp să niam chài”, Poh Niam chài Tam klăc dờng gùt jơi bơtiàn càr Dăk Lăk rơ̆p bơyai lơh bơh ngai 17 tus ngai 24 nhai 11, pơgồp bal mờ Ngai chờ Tam klăc dờng gùt jơi bơtiàn mờ Ngai bơhiàn Măt trận Jơi bơtiàn Tơrgùm dùl Việt Nam ngai 18 nhai 11.

Ồng Phạm Văn Bảy, Phó Chủ tịch Anih duh broă mặt trận Dà lơgar Việt Nam càr Dăk Lăk pà git, broă rơcang ngai chờ tàm ƀòn lơgar gam pơgồp bal mờ jờng rơ ală ƀòn ơm kis pơnrơ jăk mờ drơng gàr ală hìu nhă gơtìp kal ke in. Mặt trận Dà lơgar càr Dăk Lăk kung rơcang ai 2 rơbô 330 pò phan pà hìu rơƀah mờ hìu nhă geh sră dong kờl, tơl pò phan geh 500 rơbô đong. “Mặt trận kung neh bơto sồr ală sàh, sơnah ƀòn sền wơl ală thôn, ƀòn tàm càr nàng rơwah geh bơh 1 tus 2 ƀòn pơnrơ jăk nàng dan Mặt trận jờng rơ ƀòn ơm kis pơnrơ jăk in. Mờ yal Duh broă sùm Tỉnh ủy ai ală kwang bàng tàm Mpồl lơh kơnòl broă sùm, ală oh mi lơh broă tàm Tỉnh ủy neh geh tam pà drơng broă lơh tàm ală tiah tus bal tàm ală ƀòn geh pơnrơ jăk, nàng dong kờl mờ pơgồp bal jào pà hìu tam klăc dờng, pà phan ai ală hìu rơƀah, hìu rơƀah ngan in di tàm dơ̆ do”.