Jat hơ̆, tàm tơngai dơ̆ 2 “Broă lơh dờng 500 ngai mang” mpồl lơh broă geh gơnoar càr Lâm Đồng rơ̆p tơrgùm lòt jòi, rồ tơrgùm ƀồc ntìng cau ling chơ̆t màng tàm ù tiah 3 sàh bơh càr dê, geh:  Dăk Săk, Hải Ninh mờ Quảng Trực. Bal mờ hơ̆ nàng lơh sir kơnòl broă lòt jòi, rồ tơrgùm ết ngan rlau jơh 124 ƀồc ntìng cau ling chơ̆t màng tàm tơngai dơ̆ 2 bơh “Broă lơh dờng 500 ngai mang”, mpồl lơh broă geh gơnoar càr Lâm Đồng kung rơ̆p lam lơh jat broă lơh lòt jòi ƀồc ntìng cau ling chơ̆t màng tàm ù tiah ală sơnah ƀòn gơwèt ƀòn dờng Phan Thiết, càr Bình Thuận yau.

Ồng Đinh Văn Tuấn, Phó Chủ tịch Anih duh broă Làng bol càr, Lam bồ Mpồl Sồr lơh lòt jòi, rồ tơrgùm mờ đal gĭt mat ƀồc ntìng cau ling chơ̆t màng càr Lâm Đồng, pà gĭt, Mpồl Sồr lơh neh jàu kơnòl broă ngan ngồn ai Gah đơng lam ling klàng càr pơgồp bal mờ ală Sờh, gah, ală tiah geh gơrềng mhar kờp sền, lơh broă rơndăp lơh lòt jòi, rồ tơrgùm ƀồc ntìng cau ling chơ̆t màng mờ nùs nhơm “6 loh” mờ nền nòn; mơkung gĭt loh ală jơnau yal nàng drơng broă lơh lòt jòi.