Bơh nhai 9/2025 tus tŭ do, Kes priă dong kờl càr Dăk Lăk dờp mờr 605 tơmàn đong, neh ai rlau 434 tơmàn đong dong kờl jal mhar mờ bơsong jơnau gơ lời wơl tài bơh trồ tiah lơh aniai. Bal mờ bơta dong kờl, Kes priă “Tài cau rƀah” càr neh ai rlau 67 tơmàn đông dong kờl bơt bơtàu, lơh niam wơl hìu ơm ai hìu bơnhă rƀah, hìu bơnhă pa lik klàs rƀah mờ ală cau geh rài kis kal ke in.

Tàm dơ̆ tìp mat, bàr pe mpồl lơh sa kă bro dan cih mat pơn jat tai dong kờl Kes priă “Tài cau rƀah” mờ dờp dong kờl, dong kờl hìu bơnhă rƀah. Mặt trận càr kung yal bè broă rơndăp lơh lam lơh srơh “Kwang bàng, đảng viên, Làng bol dờp dong kờl hìu bơnhă rƀah” tơngai bơh nam 2026-2030, tàm hơ̆ ai lơh lài tàm ù tiah kal ke uă ngan, tiah làng bol jơi bơtiàn dồ ết nă cau. Ală mpồl lơh sa kă bro, mpồl cau, cau dồ nă să geh hòi jà dong kờl priă jền, sơntìl phan tam phan ròng, phan ngui lơh broă sa, bơto bơtê broă lơh mờ lơh geh broă lơh.

Tơl mpồl lơh sa kă bro gơtùi lòt bal mờ dùl halà uă hìu bơnhă; uă mpồl lơh broă kung gơtùi dong kờl dùl hìu bơnhă. Mặt trận rơ̆p lơh cau tờm tàm tơrbŏ mpồl lơh sa kă bro mờ ală hìu bơnhă kờñ dong kờl. Mặt trận ală sàh, sơnah ƀòn pơgồp bal kờp sền, bơt bơtàu broă lơh dong kờl mờ jat sền cồng nha tàm ƀòn lơgar; mơkung lơh geh ală bơta nàng cau dong kờl in jat sền tơn geh cồng nha priă jền tă pơgồp.

Ồng Y Giang Gry Niê Knơng, Chủ tịch Anih duh broă Mặt trận dà lơgar Việt Nam càr Dăk Lăk pà gĭt, broă dong kờl rơ̆p jat tàm jơnau tờm gơbàn rƀah, ală bơta mờ jơnau kờñ bơh tơl hìu bơnhă dê nàng rơwah broă lơh dong kờl di pal.

“Bol he tam gơl pràn bồ tơngoh kơlôi sơnơng bơh dong kờl bè ờs tus lòt bal bơtàu tơnguh; bơh jàu pà tềng đăp mat tus lơh geh broă lơh jŏ jòng; bơh dong kờl dùl dơ̆ tus dong kờl geh ù tiah, geh jơnau kờñ mờ geh cồng nha. Ală mpồl lơh sa kă bro ờ mìng tus bal mờ priă jền lơm mờ gam lơh jat niam bơta pràn bơh he dê bè atbồ, măi mok, drà kă bro, bơto bơtê broă lơh mờ bơsong broă lơh, kơlôi sơnơng dong kờl, lơh bal mờ ală hìu bơnhă rƀah, hìu bơnhă làng bol jơi bơtiàn dồ ết nă cau nàng lơh geh broă lơh kơ̆ kơl jăp”.