Tàm gùl kàl mìu nhai 7 nam 2025, hìu bơnhă bi Rơ Mah Huệ, ơm tàm ƀòn Dêr Sơ, sàh Ia Me, càr Gia Lai, chờ hờp dờp rò hìu ơm pa bơh Kông ty TNHH MTV Bình Dương (gơwèt Ling mpồl 15) lơh pà. Hìu ơm ơnàng pơgăp 50 thơk vuông, geh dùl cơldŭ bĭc, dùl cơldŭ wă năc mờ tiah hìu bềp trŭ gơm phan sa đah bơdìh. Bal mờ hìu bơnhă bi Rơ Mah Huệ, ơm tàm ƀòn Dêr Sơ kung geh tai 16 hìu bơnhă ndai geh dong kờl tơn jơh hìu lơh ing, hìu ồm sèt nhăt dà mìu. Ling mpồl 15 neh dong kờl jơh priă jền lơh ai 10 nơm hìu tàm ù tiah do in. Bi Rơ Mah Huệ tàm pà bơta chờ hờp: “Añ ưn ngài oh mi đoàn viên ơruh pơnu kông ty 55 neh lơh hìu ai hìu bơnhă añ in. Lài do hìu ồm sèt, tŭ do geh hìu ơm pa rao. Geh gah kông ty dong kờl lơh hìu ơm iang nùs ngan, ờ gam kơlôi rcang tai, mìng tơrgùm lơh sa mờ lơh cau lơh phan niam ngan, bè ờs rài kis”.

Thượng tá Lê Đức Toàn – Ƀí thư Đảng ủy, Phó Kwang atbòo Kông ty TNHH MTV Bình Dương (Ling mpồl 15) pà gĭt, mpồl ling neh lơh sir mờ tàm jàu 68 nơm hìu. Tơngai pa do, kông ty neh hòi jà gĭt nđờ rơbô ngai lơh broă bơh kwang bàng, cau lơh phan mờ cau lơh broă tàm dùl bă tiah. Ală hìu bơnhă geh dong kờl uă ngan là cau lơh phan gam lơh broă tàm ală mpồl lơh broă, geh rài kis kal ke uă ngan.

Bal mờ Kông ty Bình Dương, tàm nam 2025, Ling mpồl 15 neh ai jơh bơta pràn lam lơh broă lơh tơn jơh hìu lơh ing tàm làm uă tiah. Kờp jơh geh 357 nơm hìu neh geh lơh pa mờ lơh niam wơl, tàm jàu lài mờ ngai 14 nhai 07, mờ kờp jơh khà priă mờr 17 tơmàn đong. Kơnờm hơ̆, gĭt nđờ rơhiang hìu bơnhă làng bol là cau lơh phan rƀah, hìu bơnhă geh sră dong kờl Dà lơgar mờ làng bo jơi bơtiàn dồ ết nă cau kis jat kềng gah tiah nhàr lơgar càr Gia Lai neh geh ală hìu ram mhŭ kơ̆ kơnhăp. Thượng tá Lê Đức Toàn pà git:“Mpồl cau lơh phan, cau lơh hìu tàm ù tiah do ờ hoan geh ngan. Giă phan bơna gơguh uă, geh tŭ, bàr pe bơta phan gơguh tus 230% pơndrờm mờ giă bơh sơn rờp. Nàng ală hìu ơm in geh lơh kơ̆ kơl jăp, gàr niam geh ai mŭt ơm jŏ jòng, bol añ neh pơgồp bal mờ kấp ủy, gơnoar atbồ ƀòn lơgar lơh broă mờ ală mpồl tăc phan bơna bơt bơtàu nàng kờñ tàm pơn ring wơl priă tă, gàr niam bơta kơnhăp broă lơh di mờ gùng dà broă lơh bơh Cíñ phủ dê”.

Bal mờ Ling mpồl 15 (Ƀộ Ling klàng) mpồl ling sền gàr tiah nhàr lơgar càr Gia Lai kung jơh nùs pơgồp dà kơl hề tàm gùng lòt tơn jơh hìu lơh ing, hìu ồm sèt nhăt dà mìu tàm tiah nhàr lơgar. Mìng tơnơ̆ 1 nhai kờp bơh tŭ Ƀộ Ling klàng lam lơh srơh tàm pơrlòng, tus ngai 15/4, Mpồl ling sền gàr tiah nhàr lơgar càr neh lơh sir mờ tàm jàu 10 nơm hìu kơnhăp mờ kờp jơh priă jền rlau 800 tơlak đong, priă tă lơh geh hòi jà tă pơgồp bal bơh gah tă pơgồp bal ngai lơh broă bơh kwang bàng, cau ling mờ bơta tàm sơm bat tê bal bơh ală cau geh nùs nhơm, mpồl cau, cau dồ nă să geh nùs nhơm niam dê.

Ờ ơm wơl tàm hơ̆, mpồl ling sền gàr tiah nhàr lơgar pơn jat tai lòt bal mờ kấp ủy, gơnoar atbồ ƀòn lơgar, tă pơgồp gĭt nđờ rơbô ngai lơh broă dong kờl lơh 258 nơm hìu jat kềng gah rlau 20 kơi sồ gùng tiah nhàr lơgar rềp nhàr mờ lơgar Campuchia. Đại tá Trần Tiến Hải, Phó đơng lam bồ Gah đơng lam ling klàng càr mờ kung là đơng lam bồ Mpồl đơng lam Mpồl ling sền gàr tiah nhàr lơgar càr Gia Lai pà gĭt, mpồl ling sền gĭt do ờ gŏ di broă lơh jat srơh lơm mờ là kơnòl broă lơh sùm. Tài bơh dong làng bol lơh hìu, ờ mìng dong khi in geh tiah ơm kơnhăp, iang nùs lơh broă sa lơm mờ gam pơgồp bơnah tơnguh tai bơta tam klăc ling klàng làng bol, bal mờ gơ̆p sền gàr kơ̆ kơl jăp gơnoar tờm, lơngăp lơngai tiah nhàr lơgar. Đại tá Trần Tiến Hải, đơs: "Tàm ală nam do, bol añ sền gròi ngan broă dong làng bol lơh hìu đam. Tài bơh bol añ hòi jà ală cau geh nùs nhơm niam, bơta tă pơgồp bơh ală cau dồ nă să, mpồl cau, kwang bàng, cau ling dê. Tài bơh do là kơnòl broă gơwèt mờ làng bol tiah nhàr lơgar, ưn ngài nùs nhơm, bơta sền gròi bơh làng bol tiah nhàr lơgar dê gơwèt mờ mpồl ling sền gàr tiah nhàr lơgar”.

Mờ bơta tơryang tơryồng mờ nùs nhơm geh kơnòl, ală mpồl ling klàng neh pơgồp phan bơna, tàm sơm bat tê bal, pà ai làng bol tiah nhàr lơgar càr Gia Lai in ală hìu ơm kơ̆ kơl jăp, mơkung pơgồp bơnah lơh bè ờs wơl rài kis, tơnguh uă gàr tơl niam rài kis mpồl bơtiàn mờ lơh geh ală bơnàng jă kwơ màng nàng làng bol in iang nùs bơtàu tơnguh lơh sa, brồ guh lik klàs rƀah.