Gùt càr geh 8 rbô 915 hìu bơnhă geh ơm kis lơngăp lơngai tàm ală hìu kơ̆ kơljap, geh 6 rbô 828 nơm hìu lơh pa mờ 2 rbô 87 nơm hìu lơh niam wơl. Tơl nơm hìu lơh pa geh dong kờl mờr 80 tơlak đong, hìu lơh niam wơl geh dong kờl mờr 30 tơlak đong. Tàm khà 4 jơnau lơh nền tơn jơh hìu ing, Kwang àng càr Dăk Lăk neh đơng lam tơn dùl jơnau lơh nền mờ 4 rbô 825 nơm hìu, kờp jơh priă tă lơh 342 tơmàn đong, lơh gơs gờñ rlau nggùl nhai pơn drờm mờ broă rơndap lơh. Pe jơnau lơh nền gam wơl kung lơh gơs gờñ rlau mờ tŭ tơngai hơ pơrgon sơl. Broă lơh gơs broă lơh ờ mìng dong ală hìu bơnhă rƀah, ndrờm bè cau rƀah, hìu bơnhă dờp bơta dong kờl bơh mpồl bơtiàn dê mờ làng bol jơi bơtiàn dồ êt nă cau gàr kơ̆ anih ơm mờ gam ai gŏ bơta sền gròi bơh Đảng, Dà lơgar dê tàm broă lơh gàr lơngăp lơngai rài kis mpồl bơtiàn, lơh gơlik bơnàng jă nàng làng bol brồ guh bơtàu tơnguh lơh sa.