Tus bal geh kwang đơng lam Tỉñ ủy, Anih duh broă Làng bol càr bal mờ mờr 100 nă cau kơ đơng yàng pơnrơ jăk. Càr Lâm Đồng tŭ do geh 24 mpồl jăt yàng geh dờp mờ rơlao 1 tơlăk 670 rơbô nă cau jăt yàng, 3 rơbô 500 nă cau kơ đơng yàng mờ mờr 1 rơbô 300 hìu yàng lơh di mờ adăt boh lam.

Ală broă lơh jăt gùng yàng geh bơyai lơh niam, di mờ adăt boh lam, pơgồp bal nùs nhơm “kis niam tàm rài kis, lơh àng sơrdah gùng yàng”, “Lơh broă bal mờ jơi bơtiàn”. Đơs tàm pơrjum, mò Phạm Thị Phúc, Củ tịc Anih duh broă Mặt trận Dà lơgar Việt Nam càr Lâm Đồng sồr ală kấp ủy, gơnoar atbồ pơn jăt tai sền gròi, iăt nùs nhơm kơ̆p kờñ, ai geh bơta niam broă pơrjum gùng yàng. Mờ kơ̆p kờñ ală cau kơ đơng yàng, cau dong broă yàng tơnguh gơnoar, tam klăc bal mờ gơnoar atbồ bal mờ Làng bol, lơh jăk niam kơnòl broă làng bol dê, pơgồp bal tàm broă bơ̆t bơtàu càr Lâm Đồng bơtàu tơnguh kơl jăp.