Tàm dơ̆ lòt còp ngan ngồn lơgar Kộng hoà Chile, tàm càr lơgar Santiago de Chile, Củ tịc lơgar ồng Lương Cường mờ Mpồl cau ala măt Kwang bàng kâp dờng lơgar Việt Nam neh tus còp, boh bơr mờ kwang bàng, cau lơh broă tàm Anih lơh broă ala măt bal mờ ala măt mpồl bơtiàn cau Việt Nam gam ơm kis, lơh broă mờ bơsram tàm lơgar Chile.

Tàm dơ̆ tìp măt, Kwang ătbồ Anih lơh broă ala măt lơgar Việt Nam tàm lơgar Chile yal mờ Củ tịc lơgar ồng Lương Cường in bè broă lơh broă bơh Anih lơh broă ala măt dê mờ mpồl bơtiàn cau Việt Nam gam ơm kis, lơh broă tàm lơgar Chile. Kwang ătbồ Anih lơh broă ala măt đơs nền jăt tàm bơta gĭt gơ̆p ờs mờng bơh yau, geh bơ̆t bơtàu mờ bơtàu tơngguh bơh uă rơnàng kwang đơng lam bồ mờ làng bol bàr lơgar dê, kơnòl broă tờm, sùm sùm bơh Anih lơh broă ala măt lơgar Việt Nam tàm Chile dê ngan là broă gàr sùm gĭt gơ̆p cíñ trị niam bơnĕ đah 2 lơgar. Kwang bàng, cau lơh broă tàm Anih lơh broă ala măt mờ mpồl bơtiàn cau Việt Nam tàm Chile sùm pin dờn tàm gùng dà broă lơh bơh Đảng mờ Dà lơgar dê kung bè bơngă mờ gơnoar broă sơlơ bơtàu tơngguh tai bơh dà lơgar dê mờ bơta pin dờn tàm rài brồ să bơh jơi bơtiàn dê.

Tàm dơ̆ lòt còp lơgar Chile, Củ tịc lơgar ồng Lương Cường wă Củ tịc Đảng Kộng sản Chile ồng Lautaro Carmona Soto; wă đềt mềr mpồl Anih kơlôi sơnơng Niam chài Chile mờ Việt Nam.