Tàm dơ̆ lòt còp ngan ngồn lơgar Cuba, drim ngai 19/4 (jat jơ tiah do, mang ngai 19/4 jat jơ Việt Nam) tàm càr lơgar La Habana, Củ tịc Quôk hội ồng Vương Đình Huệ mờ Mpồl kwang bàng kâp dờng Quôk hội Việt Nam còp, boh bơr mờ kwang bàng, cau lơh broă Đại sứ quán Việt Nam mờ ala mat Mpồl bơtiàn cau Việt Nam tàm lơgar Cuba. Đơs tàm dơ̆ tìp mat, Củ tịc Quôk hội ồng Vương Đình Huệ tam pà bơta ngoh rơngac tŭ geh tus wơl còp dà lơgar Cuba hàng niam; tìp mat kwang bàng, cau lơh broă Đại sứ quán Việt Nam mờ ala mat mpồl bơtiàn cau Việt Nam tàm lơgar Cuba, dùl ù tiah ngài ngan mờ dà lơgar he hờ đah ne nggùl plai ù. Củ tịc Quôk hội pà git, do là dơ̆ lòt còp kwang bàng kâp dờng jơnhua ngan rlau jơh bơh kwang đơng lam bồ Việt Nam dê tus lơgar Cuba kờp bơh nam 2022 tus tŭ do.

Bơdìh mờ broă lơh ngan ngồn bơh mpồl dê gam geh ală broă lơh bơh ală kwang bàng tàm mpồl, ală ƀộ, gah broă lơh dà lơgar, càr, ƀòn dờng, mpồl lơh sa kă bro dê tai nàng sơlơ tơnguh lơh broă bal đah 2 lơgar. Củ tịc Quôk hội ồng Vương Đình Huệ sồr Đại sứ, Đại sứ quán, ală mpồl lơh sa kă bro gam bơcri priă tàm lơgar Cuba lơh gơ rề uă cồng nha; sơlơ tơnguh lơh broă bal. Củ tịc Quôk hội kơp kờñ, mpồl bơtiàn cau Việt Nam tàm lơgar Cuba pơn jat tai tàm dong kờl bal mờ gơp, tam klac rlau tai nàng tam pà bal, dong kờl bal mờ gơp. Nùs nhơm kung pal bè dà lơgar Cuba.