Sră yal pơyua Củ tịc Ủy ƀan Ñân zân càr Quảng Ninh; Mpồl đơng lam dà lơgar bè rơcăng lài pleh trồ tiah lơh aniai mờ ală ƀộ gah lơh broă geh gơrềng. Jăt Jơnau yal mhar bơh Cơldŭ lơh broă duh broă sùm Mpồl đơng lam Rơcăng lài pleh trồ tiah lơh aniai mờ jòi dong kờl cau dong kờl rềs àr mờ rơcăng lài broă làng bol càr Quảng Ninh, drim ngai 25/04, tàm dà dờng Chanh gơ wèt ù tiah thị xã Quảng Yên, càr Quảng Ninh neh gơlik geh jơnau aniai gơkram ơhò, lơh 4 nă cau roh thĭt (2 nă cau gam wơl re is geh hờ àr). Thủ tướng Cíñ phủ pơyua jơnau còp să, tam pà bal bơta muăt jrùm uă ngan tus mờ cau pròc mhàm ală hìu bơnhă cau gơtìp rềs àr, sồr Củ tịc Ủy ƀan Ñân zân càr Quảng Ninh mờ ală anih lơh broă geh gơrềng pơn jăt tai sồr lơh, lam lơh broă lơh bơsong jơnau gơ aniai, tơrgùm bàr pe kơnòl broă tơnơ̆: Pơn jăt tai hòi tơrgùm mpồl cau, măy mŏk, rơndeh rơndồ, phan bơna ngui lơh broă kờñ pal geh nàng tơrgùm jòi ală cau roh thĭt bal mờ nùs nhơm mhar ngan rlau jơh, di tŭ ngan rlau jơh.

Củ tịc Ủy ƀan Ñân zân càr Quảng Ninh sồr anih lơh broă geh gơnoar mhar  lơh loh, lùp khàu loh làng jơnau bơh tài bè lơi mờ gơbàn jơnau gơ aniai, lơh loh kơnòl nàng di tŭ ai jơnau bơsram mờ lơh glài kràñ ală lơh tìs (dilah geh) jăt di jơnau cih bơh adăt boh lam dê.