Bal mờ Tam lơh pha lin Điện Biên Phủ, Hiệp địñ Geneve geh kĭ tàm ngai 21/07/1954 neh tơn jơh dơ̆ tam lơh tam dră mờ cau sò tờm lơgar Tây thàm phà bơh làng bol lơgar Việt Nam dê, lơh geh jơnau gơdan ai srơh tam lơh dong klàs jơi bơtiàn tàm jơh gùt dunia. Tàm jơnau cih sền tàm dơ̆ bơyai lơh, Ƀộ trưởng Ƀộ Ngoại giao lơgar Việt Nam ồng Bùi Thanh Sơn đơs wih đơs wơl, Pơrjum Geneve là pơrjum dunia dờng uă lơgar bơh sơnrờp lơgar Việt Nam tus bal nàng tàm cribơyai mờ kĭ hơ̆ jơnau pơrgon ală lơgar dê bal mờ bơta tus bal tơn bơh ală lơgar dờng pràn dê.

Cồng nha lơh geh bơh lơgar Việt Nam dê Pơrjum Geneve sơnđờm bơh gùng dà kăc màng dipal ngan mờ bơta đơng lam, sồr lơh àng sơrdah ngan bơh Đảng mờ Củ tịc Hồ Chí Minh dê; bơh bơta kơ̆p kờñ ngan ring lơngai gơchul gơchồl sùm, nùs nhơm kờñ gơboh dà lơgar khin cha jak chài bal mờ bồ tơngoh jak chài mờ nùs nhơm khin cha bơh jơi bơtiàn Việt Nam dê.