Tơnơ̆ tŭ geh gùng dà bơh Anih duh broă Làng bol càr dê, ală nam do, gah lòt nhơl càr Lâm Đồng neh pơgồp bal mờ ală anih lơh broă geh gơrềng tus lùp sền nền wơl mờ dờp 33 anih lòt nhơl lơh broă sa sươn sre. Bulah bè hơ̆ tài bơh gơtìp uă bơta gơkòl tài ală jơnau cih bơh adăt boh lam gam geh ngui tŭ do dê, gơlam tus broă bơtàu tơngguh lòt nhơl lơh broă sa sươn sre tàm càr Lâm Đồng tìp uă kal ke.

Đơs pơndŭt pơrjum, ồng Phạm S, Phó Củ tịc Anih duh broă Làng bol càr Lâm Đồng đơs nền: Nàng ai tơl bơta lòt nhơl lơh broă sa sươn sre in bơtàu tơngguh pràn, gơcèng bơta tam gơl mhar tàm tơngai tus, càr gam sồr ală anih lơh broă geh gơnoar geh broă rơndăp lơh ngui ù uă jơnau kờñ ai lòt nhơl lơh broă sa sươn sre in pơn jăt bal mờ ală jơnau sồr loh làng, nền cê dan mờ kâp geh gơnăp gơnoar sền swì ring bal. Broă do lơh jăt jăt tàm bơnàng jă Adăt Ù tiah nam 2024 mờ ală sră nggal cih nền cê lơh jăt geh gơrềng.