Ơ mò Ka Hương! Dan mò pà gĭt bàr pe bơta bè srơh sơnđờm mut lơh broă bơh cau ùr tàm ù tiah kơnhoàl Di Linh, càr Lâm Đồng dê?

 Mò Ka Hương: Ơi, tàm ù tiah kơnhoàl Di Linh tŭ do oh mi cau ùr neh gĭt mờ srơh sơnđờm mut lơh broă ... Mpồl tam klăc cau ùr ală kấp bơh Dà lơgar tus ƀòn lơgar neh gĭt geh srơh sơnđờm mut lơh broă bơh oh mi cau ùr tàm ù tiah kơnhoàl Di Linh dê đơs bal mờ tàm oh mi cau ùr kòn cau K’Ho đơs is neh bơtàu tơnguh pràn mờ geh tàm làm uă tiah. Mờ nam 2024 do, tàm ù tiah kơnhoàl Di Linh neh geh 10 krơh niam bè cau ùr, tàm hơ̆ geh 07 nă oh mi kòn cau K’Ho cèng bồ tơngoh kơlôi sơnơng bơh he dê lòt tìp mat lơh kwèng mờ tus bal pơrlòng Cau ùr dong kờl sơnđờm mut lơh broă lời ai oh mi cau ùr tàm ală kấp in mờ lơh geh bàr pe cồng nha ngan ngồn. Pơn rơ bè Srơh sơnđờm mut lơh broă bơh oh mi cau ùr “Oh mi K’Ho Coffee” dê neh lơh geh cồng nha uă ngan. Bơh cồng nha neh lơh geh, Mpồl lơh broă bal Oh Mi K’Ho Coffee neh lơh gơ rề uă tiah nùs nhơm sơnđờm mut lơh broă tàm ƀòn lơgar tờm he dê tơn.

  Ơi... Mò pa đơs bè srơh sơnđờm mut lơh broă bơh Mpồl lơh broă bal Oh mi K’Ho Coffee dê! Den dan mò pà gĭt Mpồl lơh broă bal do neh gĭt mờ măi mok sồ mbè lơi nàng ngui tàm tŭ tăc bro phan bơna bơh he dê taih?

 Mò Ka Hương: “Bè gah tăc bro phan bơna bơh he dê, den Mpồl lơh broă bal do neh gĭt ngui ală phan ngui sồ bè gĭt ngui điện thoại at tê, măi vi tíñ nàng tơlik mat pang tiktok, facebook, zalo nàng tăc phan bơna he dê bơh tàm internet...”

  Dan mò pà gĭt broă jat ngui tam gơl sồ tàm gah đơng lam sồr lơh bơh ală kấp Mpồl là mbè lơi taih?

  Mò Ka Hương: “Nàng jơh ală oh mi cau ùr ndrờm gĭt mờ jat ngui uă tiah jat ngui tam gơl sồ dê, mpồl neh pờ ơdŭ tề lam, bơto pơlam dùl bă geh ngan là at tê sơñio broă nàng oh mi cau ùr in chài ngan tàm broă jat ngui măi mok sồ. Ngan ngồn tàm nam do, Mpồl cau ùr kơnhoàl Di Linh neh pờ 2 ơdŭ lời ai ală cau ùr kwang bàng tàm mpồl mờ 120 nă oh mi cau ùr tàm ù tiah do in tus bal mờ ơdŭ yal tơngĭt bơta gĭt wă bè tam gơl sồ...”

  Ơ mò, ngan ngồn srơh sơnđờm mut lơh broă tàm cau ùr jơi bơtiàn dồ ết nă cau kung gam gơtìp ờ dồ ết kal ke, den ală kấp Mpồl cau ùr neh geh ală broă lơh lơi?

    Mò Ka Hương: “Broă lơh sơnđờm mut lơh broă tàm kơnhoàl Di Linh den kung gơtìp ờ dồ ết kal ke sơl, lài ngan là geh bơh nùs nhơm bơh să tờm oh mi dê. Bàr pe nă oh mi kung ờ hềt ngan ngồn rcang lài sơl, ờ hềt tơl khin cha, ờ hềt gĭt jòi gĭt is lùp bơsram bal nàng dong kờl ai srơh sơnđờm mut lơh broă do in... Gơnoar atbồ tiah do kung neh geh uă broă lơh, broă dong kờl, bơta dong kờl ai priă càn ờ sa priă cồng uă, lời ai bơta sền gròi ai oh mi cau ùr in nàng sơlơ tơnguh tai bơta bơtàu tơnguh bơh srơh sơnđờm mut lơh broă in. Broă dong kờl bơh kấp càr kung sền gròi uă ngan srơh sơnđờm mut lơh broă tàm Mpồl lơh broă, Mpồl lơh broă bal dê. Mơya, bơta geh ngan cau ùr sơnđờm mut lơh broă tàm ù tiah do dê ờ hềt tơrgùm gơs mpồl, mpồl lơh broă bal, mờ lơh broă dềt, rah rài tàm hìu bơnhă, den broă dong kờl ờ hềt tus mờ ală cau do.

  Di dơ̆ tơngah kir sơnrai Ngai cau ùr Việt Nam, mò kờñ pơyoa jơnau yal bơr lơi tus mờ oh mi sơl?

Mò Ka Hương: “Di dơ̆ tơngkah kir sơnrai Ngai tơnggơs Mpồl tam klăc cau ùr Việt Nam, do là dơ̆ nàng tơl nă cau in lời ai bơta sền gròi tus mờ oh mi cau ùr, añ dan pơyoa jơnau nting bơr gờm chờ tus jơh ală oh mi tàm jơh gùt ƀòn lơgar geh bơta pràn kơl să jan uă ngan, nùs nhơm sùm hờn chờ mờ bơta pa. Añ kơ̆p kờñ oh mi bol he pal geh bồ tơngoh kơlôi sơnơng niam ngan tềng đăp mat, tơnơ̆ hơ̆ cèng bồ tơngoh kơlôi sơnơng hơ̆ lơh gơrề uă tus mờ tơl nă cau gùt dar, lơh geh bơta gơn kơnờm nàng oh mi in sùm pơnđơl pràn mờ lơh ngan, pơgồp bơnah bơt bơtàu hìu bơnhă, ƀòn lơgar ngai sơlơ hờm ram mờ kis chờ hờp.

Ơi, dan ưn ngài mò uă ngan