Pơn jăt tai broă lơh Pơrjum dơ̆ 08, Quôk hội khoă XV, drim ngai 22/10, Quôk hội neh cribơyai tàm hìu pơrjum bè bàr pe tơnggume gam geh jơnau đơs krơi is bơh jơnau rơcăng cih Adăt Tam gơl, bơtơl bàr pe bơta bơh Adăt Sơnơm tơm ba dê. Gròi sền giă, kơryan gơnoar is kă bro sơnơm, phan ngui lơh sơnơm, tàm pơrlòng giă sơnơm, kơnòl bơh mpồl cau, cau dồ nă să lơh jăt cih yal sơnơm, ătbồ sơnơm…là ală tơnggume geh uă cau ala măt sền gròi, tă pơgồp jơnau đơs.

Mblàng yal lơh loh tai ală jơnau kơlôi rơcăng bơh cau ala măt dê, Ƀộ trưởng Ƀộ Lơh sơnơm mò Đào Hồng Lan đơs là, broă dong kờl ai lài bơcri priă bơtàu tơngguh lơh sa mờ măy mok sơnơm tơm ba tŭ do gơ ơm rah rài tàm ală sră nggal adăt boh lam ndai bè adăt ù tiah, adăt bơcri priă…pal cih geh bơta krơi is gơ wèt mờ bơta broă lơh mpồl lơh sa kă bro do tŭ tam gơl adăt bơcri priă, adăt dia priă lơh geh mpồl lơh sa kă bro dê