Tổng Ƀí thư ồng Tô Lâm đơs nền tai gùng dà ờ tŭ lơi tam gơl bơh Đảng, Dà lơgar mờ Làng bol Việt Nam dê sền dờng màng ngan mờ jơh nùs lơh jơh ală bơta lơi gơtùi lơh tàm jơnau tơl pràn, bal mờ Đảng, Dà lơgar mờ Làng bol Cuba sùm rề ơnàng mờ lơh jrô ơnàng rlau tai bơta gĭt gơ̆p tam klăc ờs mờng bơh yau, lơh bơyô bal is ồn mờ lơh broă bal tơl làm đah Việt Nam mờ Cuba, tài bơta kwơ bơh làng bol bàr lơgar dê, tài broă lơh bơ̆t bơtàu củ nghĩa xã hội mờ tài ring lơngai, kơ̆ kơl jăp, lơh broă bal mờ bơtàu tơngguh tàm dunia.

Tổng Ƀí thư ồng Tô Lâm đơs wơl ală jơnau kah wơl niam ngan mờ cồng nha kwơmàng ngan lơh geh tàm dơ̆ lòt còp kâp Dà lơgar tus lơgar Kộng hòa Cuba bơh Tổng Ƀí thư dê, đơs sùm bơta ring bal kwang bàng kâp dờng bơh Kwang đơng lam bồ bàr Đảng, bàr Dà lơgar dê tàm ală pơlam gùng mờ broă lơh broă bal ai lài: broă lơh sa sươn sre, năng lượng, kă bro phan, măy mok phan kis, mơkung ai tơl bơta lơh broă bal niam tàm ală broă lơngăp lơngai, sền gàr dà lơgar, lơh broă mờ lơgar ndai mờ ală broă lơh tìp măt lơh kwèng, lơh broă bal đah ală gah, ală kâp mờ làng bol bàr lơgar dê.