Dăk Lăk tŭ do geh rlau 217 rbô 600 lồ kơphe mờ mờr 33 rbô 800 lồ kau su. Broă atbồ tiah tam phan, git nền anih lơh gơlik phan mờ gròi sền jơnau pơhìn gơ rềng tus roh brê geh kuơ dờng ngan gơ wèt mờ bơta pràn gàr sùm drà kă bro tac phan hờ lơgar ndai bơh 2 gah lơh phan tờm ngan do dê.

Tŭ do, càr lam lơh ndrờm bal ală kơnòl broă, bơh bơt bơtàu anih yal tơnggit jơnau, sền wơl jơnau yal tơnggit tiah tam tus tơnguh jơnau git wă mờ pràn jak lam lơh mpồl lơh sa kă bro, mpồl lơh broă bal, làng bol dê. Sờh Jak chài mờ Măi mok càr Dăk Lăk geh jàu bơt bơtàu, atbồ mờ ngui anih yal tơnggit jơnau, drơng broă lam lơh jat ală jơnau sồr Mpồl tam klac châu Âu dê. Sờh Broă lơh sa suơn sre mờ Tiah ơm kis càr Dăk Lăk geh kơnòl tơng gơs Jơnum lơh broă EUDR kâp càr nàng pơgồp bal lam lơh ală kơnòl broă. Gơnoar atbồ ală sàh, sơnah ƀòn lơh pràn mblàng yal, pơlam làng bol; sền wơl, yal jơnau tơnggit bè cau tờm lơh sa, anih mờ bơta geh ngan ngui ù tàm ƀòn lơgar. Do là bơta tờm kuơmàng ngan nàng tơnguh bơta pin dờn jơnau yal tơnggit tiah tam phan dê, drơng broă tàm pơndrờm mờ jơnau yal tơnggit ù tiah mờ jơnau tơnggit brê.