Tàm pơrjum, cau tĕ khà dan tơrgùm tàm ală broă rài kis broă lơh làng bol, phan bơna mờ broă lơh broă sa. Tàm hơ̆ kờñ gờñ bơsong bơta gơmù ờ niam, gơbam dà tàm gơl gùng sồ 1 lòt gan sơnah ƀòn Bình Kiến; bơcri priă lơh niam hìu pơrjum mpồl bơtiàn mờ broă lơh nàng pleh mờ rềs àr bơh trồ tiah tàm ală ƀòn gal làng bol ơm kis, tiah thòng.

Cau tĕ khà kung dan sền gròi broă dong kờl gơwèt mờ kwang bàng lơh broă tàm ƀòn lơgar bal mờ cau dờng sơnam. Pơn dŭt dơ̆ tìp mờ cau tĕ khà, ồng Nguyễn Thanh Nghị dờp ală jơnau đơs, jơnau dan bơh cau tĕ khà dê; bơh tŭ hơ̆, sồr gơnoar atbồ, anih lơh broă geh gơnoar càr Dăk Lăk tam cah is mờ bơsong jơh ală broă gơwèt gơnăp gơnoar. Ală tơngu me sơrlèt mờ gơnăp gơnoar pal geh tơrgùm, jào tus anih lơh broă geh kơnòl in sền sơwì. Mpồl cau ala măt Quốc hội càr geh kơnòl sền gròi, jăt sền broă bơsong, gàr niam jơnau dan di pal bơh cau tĕ khà dê geh bơsong.