Mờ jơnau yal “Lơh di bơta kwơ - Yal jơnau Việt Nam - Bơceh lơh bơta niam lơh sa suơn sre, phan sa mờ lòt nhơl gơlòt bal”, pơrjum bơyai tơrgùm tàm gùng dà broă tơrbŏ bal làng bol lơh broă sa suơn sre mờ mpồl lơh sa kă bro lơh gơs phan, tam pà mờ lòt nhơl; lơh di jơh tiah tam, ngui măi mok, bơ̆t bơtàu măt kă bro mờ rề ơnàng drà kă bro tàm ală lơgar. Tàm lơh sa, jơnau kờñ geh ai là sền gròi bơta niam, gàr niam broă ai phan kơl jăp mờ di pal jơnau geh ai bơh tơl drà kă bro dê. Tàm broă lơh gơs phan, ală măi mok bè bơsong bơta pràn uă, pơr lơh rañ, lơh pơn đồm geh sền gròi, pơgồp bal kơl dung kloh niam mờ jòi gŏ anih lơh mờ măi mok sồ geh đơs tus nàng tơnjŏ tơngai prăp gàr, tơrmù bơta hoàc huơr mờ uă bơta phan geh lơh. Broă ngui phan geh lơh ing kung pơgồp bal tàm broă lơh gơguh bơta kwơ, tơrmù tơlik phan ƀơ̆.

Tam pà broă lơh mờng chài ngui măi mok tàm broă ròng phan mờ sền gròi bơta niam dà toh, ồng Đoàn Trung Kiên, Kwang Lam bồ Wàng dờng ròng kơnrồ dà toh NutiMilk tàm sàh Mang Yang, càr Gia Lai pà git, phan atbồ mpồl kơnrồ geh tơrgùm jơnau yal tơngit sùm, dong kờl sền gròi pràn kơl dang mờ broă lòt rê bơh phan ròng dê. “Mờ kờp jơh mpồl kơnrồ tus 12 rơbô nơm, den broă bơcri priă, ngui mpồl măi mok pa tàm broă atbồ jơnau tơngit mpồl kơnrồ pal geh lơh. Do là mpồl atbồ bơh lơgar Israel dê. Bè hơ̆ tàm 10 phút là geh tai jơnau tơngit bơh kơnrồ dê geh tơrgùm, bè bơta pràn lòt rê, bơta pràn khiang kàng, ai tơngŏ bè bơta pràn”.

Ờ mìng tơnguh uă bơta niam phan geh lơh, broă ai phan geh lơh bơh suơn sre tus mờ cau ngui sa bơh phan sa, jơnau yal ù tiah ƀòn lơgar mờ lơh broă lòt nhơl kung geh ai là gùng dà lơh gơguh bơta kwơ. Broă lơh do pal geh broă tus bal bơh làng bol lơh broă sa suơn sre, cau chài trŭ sa, cau chài, cau jăk chài mờ mpồl lơh sa kă bro lòt nhơl. Ală jơnau yal bè phan geh lơh, phan sa, broă lơh ờs mờng pal geh ai bơh tàm bơta kwơ mùl màl; làng bol ƀòn lơgar pal geh tus bal mờ dờp bal bơta kwơ ndrờm bal.

Mò Nguyễn Thị Thanh Lịch, Phó Chủ tịch Anih duh broă Làng bol càr Gia Lai đơs là, bơta pràn phan geh lơh uă bơta bơh tiah bơnơm tus tiah dà lềng, lơh geh bơta niam nàng càr bơtàu tơnguh ală broă lơh sa suơn sre pơgồp bal mờ phan sa mờ lòt nhơl. Mơya, nàng lơh bơta geh gơs broă lơh broă sa jŏ jòng, làng bol lơh broă sa suơn sre pal geh rơcang lài jơnau git wă drà kă bro, jơnau git wă kă bro mờ dong kờl tìp mờ ală khà phan tăc mờ lơgar bơdìh. “Lơh sa suơn sre, làng bol lơh broă sa suơn sre jăk pal git phan geh lơh bơh să tờm dê, geh tăc bè lơi. Pal git tus mờ broă tăc phan mờ drà kă bro châu Âu den pal gàr niam phan bè lơi, tàm drà kă bro lơgar Lo den bè lơi. Den he pal geh jơnau git wă, jơnau wă di pal. Kơnòl bơh càr, bơh kwang đơng lam ală sờh, gah lơh broă, ală sàh, sơnah ƀòn lơh broă bal, bơ̆t bơtàu kơnroăt boh lam nền nòn, ai geh gùng lòt, dong kờl lơh broă, bơsong tàm tŭ làng bol lơh broă sa suơn sre gơtìp kal ke”.