Tàm dơ̆ tìp, mò Nguyễn Hương Trà,  Kwang ătbồ Anih lơh broă ala măt lơgar Việt Nam tàm lơgar Bỉ, Lam bồ Mpồl ala măt Việt Nam tàm Mpồl Tam klăc câu Âu pà gĭt, tŭ do geh pơgăp 1 tơlak 500 rbô nă cau Việt Nam ơm kis tàm câu Âu. Mpồl bơtiàn ngai sơlơ bơtàu tơngguh, kis gơrờm bal niam, tam klăc, prăp gàr bơhiàn niam chài krơi is mờ geh uă tă pơgồp ai ƀòn tờm, ai dà lơgar in. Đơs tàm do, ồng Tô Lâm, Tổng Bí thư, Chủ tịch lơgar cih dờp, jờng rơ ală tă pơgồp bơh mpồl bơtiàn cau Việt Nam dê tàm câu Âu, is ồn là gơnoar broă bơh ală mpồl cau tàm bơ̆t bơtàu pràn kơldăng mpồl tam klăc dờng mờ chồl tơngguh gĭt gơ̆p lơh gơ̆p bơyô đah Việt Nam mờ ală lơgar.

Đơs sùm dà lơgar gam mŭt tàm tŭ tơngai bơtàu tơngguh pa, ồng Tô Lâm, Tổng Bí thư, Chủ tịch lơgar sồr làng bol he tàm lơgar ndai pơn jăt tai ngui niam bồ tơngoh jak, mờng chài, bơta pràn; tàm tơrbŏ mpồl lơh sa kă bro, cau gĭt wă jrô, cau geh bồ tơngoh jak mờ chồl pràn tàm jàu jak chài, măy mŏk rê hờ lơgar. Ală anih lơh broă ala măt lơgar Việt Nam tàm lơgar bơdìh pal lơh niam broă lơh sền gàr dong kờl làng bol he tàm lơgar ndai, dong kờl mpồl bơtiàn, ai tơl bơta nàng làng bol he tàm lơgar ndai tă pơgồp ngan ngồn tàm broă lơh bơ̆t bơtàu mờ bơtàu tơngguh dà lơgar.