Jăt Sờh Lơh sa mờ măy mŏk mờ Kă bro phan càr Dăk Lăk, tàm 9 nhai do, kờp jơh priă geh bơh tăc phan mờ lơgar ndai càr dê kờp dŭ geh 2 tơmàn 300 tơlak dolar Mỹ, gơguh rlau 6% pơndrờm bal dùl tŭ mờ nam lài. Is sầu riêng geh rlau 261 tơlak dolar Mỹ, gơguh rlau 61 tơlak dolar Mỹ pơndrờm mờ jơh gùt nam 2025. Tàm broă lơh, mpồl lơh sa kă bro yal kal ke tàm broă lơh màh sồ tiah tam mờ broă tơrgùm blơi ờ hềt gơ jăt bal mờ jơnau sồr jòi gĭt anih tờm lơh gơlik. Ồng Huỳnh Văn Kiều, Kwang Lam bồ Kông ty Tăc blơi mờ lơgar ndai phan lơh geh bơh sươn sre Hoa Kiều, pà gĭt:

“Làng bol tŭ do gam tìp kal ke tàm broă lơh màh sồ tiah tam tàm tŭ tơrgùm blơi sầu riêng gơ wèt mờ ală cau geh màh sồ tiah tam mờ ală cau ờ hềt geh màh sồ tiah tam kung ờ lin bè giă sơl. Ngan tài bè hơ̆ rơ̆p ờ ndrờm bal tàm broă tăc mờ lơgar ndai, tài bơh màh sồ tiah tam gơrềng tus lơgar lơh gơlik, anih tờm lơh gơlik plai sầu riêng”.

Bơdìh gơkòl bè màh sồ tiah tam, ală anih ơn prăp phan mrềt, sền gàr ơn prăp mờ lơh gơlik phan tàm Dăk Lăk kung gam ờ hềt pràn jak sơl. Lơh bal đah ală tiah tam, mpồl lơh broă bal, anih dăp ơn klơm mờ mpồl lơh sa kă bro tăc mờ lơgar ndai ờ hềt kơ̆ kơl jăp; sầu riêng mìng tăc mờ lơgar ndai jăt bơta tăc plai ris gời lơm. Nàng tă bơsong kal ke, cau ala măt dan lơh kơ̆ kơl jăp ală anih lơh gơlik, tơngguh cồng nha ătbồ màh sồ tiah tam mờ sok sền bơta niam; sơlơ tàm tơrbŏ tai tơn mờ cau blơi phan lơgar ndai nàng rơhời lơh rơ̆ ru drà tăc.

Tus bal broă lơh kơphe cau kă bro, ồng Đỗ Hữu Huy, Chủ tịch Anih duh broă Làng bol càr Dăk Lăk sồr ală sờh, gah iăt kơno jơnau đơs, dong kờl mpồl lơh sa kă bro bơtàu tơngguh gah phan sầu riêng kơnhăp jŏ.

“Càr sền gròi ngan tus broă lơh gơlik phan geh bơta kwơ uă. Nam do, càr neh kĭ lam lơh ală anih lơh sa mờ măy mŏk, drà bơh chờm tàm ală tiah lơh sa mờ măy mŏk. Tàm tơngai tus pal geh bơta lòt bal bơh Tơrgùm ală mpồl sầu riêng dê tàm broă tơrgùm blơi sầu riêng, lơh gơlik phan halà tì sơnề tăc mờ lơgar ndai halà lơh gơlik phan ală phan bơna geh bơta kwơ uă rlau, mờ bol he mìng tam tơnơ̆ hơ̆ tăc mờ lơgar ndai plai ris gời lơm bè hơ̆ den là ờ geh bơta kwơ gơguh tai uă".