Tàm rlau 1 lồ ù mìr bơh hìu bơnhă ồng Nguyễn Trung Đông dê tàm thôn Chư Ty 4, sàh Đức Cơ, càr Gia Lai, ală tềl rơdàng rơ̆ ru ngan tàm gùl sươn kơphe. Uă bă ù neh gơtìp gơhoài gơ hŭc, gơ hoài jăt bal chi tam. Ồng Đông kờp dŭ geh rơhiang tờm kơphe neh gơtìp hoàc hươr. Ồng kơlôi rơcăng ngan tài tềl rơđàng do neh geh bơh ală nam lài, mơya nam do pơn jăt tai gơ dŏ jòng, lơh gơrề uă tơnơ̆ ală dơ̆ mìu dờng. Bal mờ mìr bơh ồng Đông dê, gam geh bă mìr bơh 2 hìu ndai dê tàm dùl thôn bal gơbàn jơnau ndrờm bè do sơl, mờ kờp jơh bơta jòng tềl rơđàng gơhoài ñchùn gơhŭc ù là 1 kơi sồ nggùl.

"Bơta jrô tŭ do tềng gùl bă sươn digơlan jrô pơgăp 1 thơk 2 rao bờh, ờ hềt gĭt pal lơh bơsong wơl bè lơi sơl. Rơcăng mŭt pik kơphe mờ mŭt tàm sươn den ờ gŏ khin lòt. Tềl rơđàng kơnờm geh rơyas kơphe glòm wơl, añ kơlôi là ờ geh chi lơi, cơn đoà lòt den gơ tơrlơm. Tơrlah tơrlơm gơdùh jơh jơng tềng hơđơm rao, ờ gŏ khin lòt tus sươn kơphe tai ờ”.

Cồng nha sền swì dồ êt bơh Anih duh broă Làng bol sàh Đức Cơ dê pà gŏ, kơnhoàl ù tiah rơđàng ù tàm thôn Chư Ty 4 neh geh jơnau gơ tam gơl bơnàng ù, gơhŭc ñchùn ù bàr pe tiah mờ geh tềl tơngŏ tơrlah tơrlơm ù, gơrềng tus uă lồ ù lơh sa bơh 3 hìu làng bol dê. Anih duh broă Làng bol sàh neh căng tiah yal tơngkah, bơto sồr làng bol, ngan là kơnòm dềt, bañ tus rềp ală wah rơđàng mờ ờ gŏ di jun măy mŏk lơh gơ tŭp tàm tiah ñchùn gơhŭc ù. Ồng Nguyễn Văn Tuyến, Chủ tịch Anih duh broă Làng bol sàh Đức Cơ pà gĭt, sàh neh geh sră dan Sờh Broă lơh sa sươn sre mờ Tiah ơm kis càr Gia Lai sền wì gĭt nền loh jơnau bơh tài gơbàn, bơnah gơrềng mờ bơta sơbơng roh nàng pơlam ờ huan lơh sa mờ săc rwah gùng dà broă rơndăp lơh bơsong niam lơngăp lơngai.

"Anih hơ̆ lài do kơnhoàl neh jà Sờh Phan kwơ geh is tus sền jơh rao. Mìu uă bal mờ ală anih ù cờñ pă phan dơlam ù, jŏ ngai mìu sùm bàr nhai tơn. Bơh sơnrờp mblàng yal, hòi jà làng bol yal tơngkah: tŭ lòt mìr lòt sươn rềp hơ̆ pal kơrhia ngan, ờ bơtuah gơtìp nthiar jơng gơdùh gơ pừ tàm ală tiah hơ̆ là sơbơng roh ngan. Tơngai tus, sàh rơ̆p kờp dŭ broă rơndăp lơh tồt kƀàng yal tơngkah lài pleh ală rềs àr gơ aniai”.

Tơrlah tơrlơm, ñchùn gơhŭc ù tàm đah măt tơngai mŭt càr Gia Lai gơbàn pràn ngan tàm bàr pe nam rềp ndo, ngan là tàm ală sàh Ia Krêl, Ia Ly mờ sàh Gào, gơrềng tus lŏ sre, mìr mờ lơh aniai ờdiơng broă bơ̆t bơtàu gùng lòt. Ồng Ngô Vĩnh Khánh, ătbồ ing Lam bồ Ci Kụk Dà drơng lơh sa mờ rài kis (thủy lợi) càr Gia Lai pà gĭt, mờ ală anih tơrlah pơhìn tiah làng bol ơm kis, ală ƀòn lơgar geh sồr căng tiah yal tơngkah lài, sền swì bơ̆t kơ̆ wơl mhar halà ntrờn làng bol. Gơ wèt mờ ù mìr gơtìp hoàc hươr, Sờh Broă lơh sa sươn sre mờ Tiah ơm kis neh sồr sền swì, tơrgùm kờp loh làng nàng lơh cơng tàng dan dong kờl.

"Tŭ do, gơ wèt mờ ală anih tơrlah, Sờh geh sră pơyua ai ală ƀòn lơgar in yal bơta hoàc hươr, jăt tàm hơ̆ rơ̆p dong kờl lơh wơl lơh sa. Tơnơ̆ tŭ geh hoàc hươr bơh ală ƀòn lơgar dê pơyua rê, Sờh Broă lơh sa sươn sre rơ̆p tơrgùm jơh tơngume pơyua Sờh Priă jền in nàng jăt tàm bơta hơ̆ tam pà dong kờl ai ală ƀòn lơgar in drơng lơh sa”.

Bal mờ dong kờl tềng đăp măt, broă lòt sền nền ală tiah geh pơhìn tơrlah, ñchùn gơhŭc hùc ù tàm càr Gia Lai rơ̆p dong ƀòn lơgar rơhời jòi gùng dà broă rơndăp lơh dipal nàng sền gàr anih ơm mờ lơh sa làng bol dê. Hơ̆ kung là cơng tàng nàng làng bol iang nùs lơh sa.