Chủ tịch Quốc hội neh còp Siêu hìu măi rơndeh điện Xiaomi mờ Tập đoàn Thị Nguyên (CVTE); lòt sền tiah ràng tơlik phan, hìu lơh rơndeh điện bal mờ ală phan tơlik rùp lơh broă ngui măi mok AI tàm ală gah broă CVTE dê.

Chủ tịch Quốc hội tơlik nùs nhơm di nùs ngan mờ đơs niam ală cồng nha bơtàu tơnguh bơh Xiaomi mờ CVTE dê; mờ pà git, lơgar Việt Nam sùm jờng rơ ală mpồl lơh sa kă bro măi mok lài ngan tus jòi sền nàng git geh bơta niam bơcri priă, rề ơnàng lơh broă bal, tàm hơ̆ uă ngan là tàm gah rơndeh điện, pil, mpồl phan prăp năng lượng, bơta ngăc ngar kòn bơnus lơh gơs, lơh is mờ bơtàu tơnguh mpồl ai phan dê. Ồng Trần Thanh Mẫn, Chủ tịch Quốc hội đơs nền, Quốc hội lơgar Việt Nam sùm sền gròi lơh gơs mpồl adăt boh lam, lơh niam tiah bơcri priă, kă bro jăt gùng dà loh làng, kơl jăp mờ ƀuơn, gàr gơnoar kwơ di mờ adăt boh lam bơh cau bơcri priă dê; tŭ lơi kung iăt ală jơnau đơs di pal bơh mpồl lơh sa kă bro, pơn jăt tai lơh gơs adăt boh lam, ai tơl bơta ƀuơn nàng mpồl lơh sa kă bro lơgar bơdìh in bơcri priă mờ lơh broă jŏ jòng, geh cồng nha tàm lơgar Việt Nam, tàm tơngu me lơh jăt adăt boh lam mờ gàr jơnau ring bal đah bơta kwơ bơh ală gah dê.