Jat jơnau yal bơh Bộ Broă lơh sa suơn sre mờ Tiah ơm kis, tàm 38 jơnau sồr bơh EC dê, geh 31 jơnau sồr neh lơh sir, gam 5 jơnau sồr gam pơn jat tai geh lơh sir jat broă lơh mờ 2 jơnau sồr kờñ cribơyai, lơh loh tai nàng gàr niam di pal mờ bơta geh ngan mờ adat boh lam Việt Nam dê. Tus jơh nhai 9, gùt lơgar geh rlau 80 rơbô nơm ơhò ka geh dan cih mat, sền gĭt tàm ală jơnau lơh ka dà lơgar. Khà ơhò neh crăp măi mok jat sền gùng lòt lơh geh mờr 99%.

Đơs pơndŭt pơrjum, Phó Thủ tướng sồr bơh tŭ do tus lồi nam kràñ cê jơh nùs lơh jat “5 ờ” tàm kơryan lơh ka IUU: ờ geh tai ơhò lơh ka gơtìp lơgar ndai kŭp; ờ gŏ lời ơhò lơh ka ờ tơl ală bơta kŭp ka tàm dà lềng; ờ gŏ di lơh tìs mờ VMS jŏ jòng; ờ gŏ di lời bơnah phan ờ tơl bơta pràn jòi gĭt tiah tờm kŭp ka; ờ gŏ di lời jơnau tìs pơndrờm mờ ală jơnau, sră nggal mờ bơta geh ngan. Ală tiah pal atbồ kơ̆ ơhò lơh ka, gàr niam ală jơnau yal di ngan, lơh bal ală tiah, gơtùi sền gĭt; bơsong jơh ală bơta gam geh, ờ gŏ di lời dùl tiah lơi lơh ờ hềt niam gơrềng tus bơta lơh ngan bal tàm jơnau kờñ tă sră “rơ mĭt” bơh EC dê.