Tus jơh nhai 9, càr Lâm Đồng geh 8 rơbô 160 nơm ơhò lơh ka bơh 6 thơ̆k rơlao hờ đang neh dan cih măt, tơrgùm tàm tơngu me jơnau tơngit broă lơh ka dà lơgar dê. Pal kah ngan, khà ơhò lơh ka di gơlan gơtìp tìs IUU gam tàm khà uă.

Bơh bồ nam tus tŭ do, mpồl lơh broă geh gơnoar tàm càr neh bơyai lơh rơlao 1 rơbô 200 dơ̆ lòt sền, sền gròi rơlao 6 rơbô 700 nơm ơhò lơh ka, gŏ 212 nơm ơhò gơtìp tìs, lơh glài kờp jơh khà priă rơlao 3 tơmàn 700 tơlăk đong. Càr Lâm Đồng kung sền wơl, đal git di pơgăp 300 nơm ơhò lơh ka di gơlan lơh tìs tàm dà lềng lơgar bơdìh mờ 864 nơm ơhò ờ tơl sră nggal nàng lơh broă, nàng sồr mpồl lơh broă atbồ nền nòn ơhò lơh ka mờ cau tàm ơhò. Mpồl Sồr lơh dà lơgar sồr, broă atbồ ơhò lơh ka tàm càr Lâm Đồng kung gam uă bơta pal bơsong. Khà ơhò di gơlan gơtìp tìs mờ ơhò ờ tơl sră nggal lơh broă gam uă mờ kờp jơh rơlao 1 rơbô 500 nơm. Tềng đăp mờ jơnau sồr tam dră mờ lơh IUU, Anih duh broă Làng bol càr Lâm Đồng neh yal 2 bơta ơhò lơh ka ing, lơh geh jơnau yal tơngit atbồ lik mờ mŭt pah ngai. Sền wơl ală tiah tus mờ ơhò lơh sa sùm tus ơm ing, mờ jào kơnòl broă ai tus tơl ƀòn lơgar in sền gròi ơhò lik mờ mŭt tàm ală anih do.